Alaıaqtyq jolmen paıda tapqysy kelgen aqtóbelik depýtattar bas bostandyǵynan aıyryldy
AQTÓBE. KAZINFORM - Sot bes qabatty jataqhanany 8 mln teńgege satyp alyp, keıin ony Muǵaljar aýdany ákimdigine satpaq bolǵan depýtattardy aıypty dep tanydy. Alaıaqtyǵy úshin sottalǵan Muǵaljar aýdandyq máslıhatynyń tóraǵasy Baqytjan Qadralınniń múlki tárkilendi.
Muǵaljar aýdandyq máslıhatynyń tóraǵasy Baqytjan Qadralın, aýdandyq máslıhat depýtaty Azamat Jálimbetov jáne Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshy Ánes Seıilhanǵa «Alaıaqtyq», «Qylmystyq jolmen alynǵan aqshany jáne ózge de múlikti zańdastyrý», «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» baptary boıynsha aıyp taǵyldy.
Іs materıalyna súıensek, máslıhat tóraǵasy qyzmetin atqarǵan sottalýshynyń 5 qabatty jataqhanany satyp alyp, keıin ony áıeline syıǵa bergen, artynsha óz atyna qaıta jazdyrǵan. Sóıtip jataqhanaǵa jóndeý jumystaryn júrgizý úshin memlekettik satyp alýǵa qatysyp, 672 mln teńgeden astam shyǵyn keltirdi. Sot úsh sottalýshyny da aıypty dep tanydy.
- Azamat Jálimbetovti Qylmystyq kodekstiń 190-baby 4-bóligi 2-tarmaǵy boıynsha aıypty dep tanyp, 6 jylǵa bas bostandyǵynan aıyrý jazasy taǵaıyndalsyn. Azamat Jálimbetov Qylmystyq kodekstiń 385-baby 2-bóligi boıynsha aqtalsyn. Jazasyn qaýipsizdigi ortasha túzetý mekemesinde ótesin,- dedi sýdıa S. Іzbaǵambetova.
Al Muǵaljar aýdandyq máslıhatynyń tóraǵasy Baqytjan Qadralın Qylmystyq kodekstiń «Alaıaqtyq», «Qylmystyq jolmen alynǵan aqshany jáne ózge de múlikti zańdastyrý» baptary boıynsha aıypty dep tanylyp, túpkilikti 6 jyl 6 aıǵa bas bostandyǵynan aıyrý jazasy taǵaıyndaldy. Múlki tárkilenedi. Onyń ishinde Aqtóbe oblysy Muǵaljar aýdany Qandyaǵash qalasyndaǵy úsh jyljymaıtyn múlik bar. Sonymen birge ekinshi deńgeıli bank depozıtterindegi 291 mln teńge, 21,6 mln teńge jáne 10,5 mln teńge memleket paıdasyna óteledi. Dúısenovanyń atyndaǵy depozıtte saqtalǵan 49,6 mln teńge de tárkilendi.
Muǵaljar aýdandyq sáýlet, qurylys jáne qala qurylysy bólimi basshysynyń mindetin ýaqytsha atqarýshy Ánes Seıilhan 190-baby 4-bóligi 2-tarmaǵy boıynsha aıypty dep tanylyp, 5 jylǵa bas bostandyǵynan aıyryldy. Úsh sottalýshy da memlekettik qyzmette, qarjylyq uıymdardy jumys isteý quqyǵynan ómir boıyna aıyryldy.
Muǵaljar aýdany ákimi apparatynyń azamattyq talap aryzy tolyq qanaǵattandyryldy. B.Qadralın, A.Jálimbetov jáne Á. Seıilhan birlesken túrde 672 mln teńge materıaldyq shyǵyndy tolyq óteýi tıis.
Buǵan deıin habarlaǵanymyzdaı, jaryssózde prokýror eki depýtatty 6 jyl 8 aıǵa bas bostandyǵynan aıyrýdy, sonymen birge Muǵaljar aýdandyq máslıhatynyń tóraǵasy bolǵan sottalýshynyń qylmystyq jolmen alǵan múlkin tárkileýdi surady.
