Alaıaqtyq jasaǵan Qazaqstan azamaty Reseıden ekstradıtsııalandy

ASTANA. KAZINFORM — Uıymdasqan qylmystyq toptyń quramynda serııalyq alaıaqtyq jasaǵan kúdikti Reseıden ekstradıtsııalandy. Bul týraly Bas prokýratýra habarlady. 

Bas prokýratýra birneshe ret alaıaqtyq jasaǵan Qazaqstan azamatyn qylmystyq jaýaptylyqqa tartý úshin Reseı Federatsııasynan ekstradıtsııalandy.

Kúdikti 2023–2024 jyldary uıymdasqan qylmystyq top quramynda aqparattyq júıe paıdalanýshylaryn aldaý jáne olardyń senimin teris paıdalaný arqyly iri mólsherde alaıaqtyq jasaýǵa birneshe ret járdemdesken.

Atap aıtqanda, kúdikti men onyń sybaılastary Instagram áleýmettik jelisin paıdalanyp, azamattardyń senimine kirip, salynǵan ınvestıtsııa somasynan birneshe ese kóp tabys alýǵa ýáde berip, óz kompanııalary arqyly aqsha qarajatyn ınvestıtsııalaýǵa úgittegen.

Aqsha qarajattaryn alǵannan keıin, olardy qylmystyq top qatysýshylarynyń arasynda bólip, óz qajettilikterine jumsaǵan.

— Alaıaqtardyń qylmystyq áreketteri saldarynan Qazaqstannyń ártúrli óńirlerindegi 75 azamatqa jalpy somasy shamamen 80 mln teńge kóleminde zalal keltirilgen.

Qylmys jasalǵannan keıin 4 sybaılas ártúrli merzimge bas bostandyǵynan aıyrý jazasyna kesilgen, al sońǵysy qylmystyq qýdalaý organdarynan boı talasap, osyǵan baılanysty halyqaralyq izdeýge jarııalanǵan, — delingen habarlamada.

2025 jylǵy naýryzda ol Reseı Federatsııasynyń aýmaǵynda ustalyp, Qazaqstan Respýblıkasynyń Bas prokýratýrasynyń suraý salýy boıynsha elge ekstradıtsııalandy.

Qazirgi ýaqytta ol tergeý ızolıatoryna qamaldy.

Oǵan taǵylǵan qylmystardy jasaǵany úshin 5 jyldan 10 jylǵa deıin bas bostandyǵynan aıyrý jáne múlkin tárkileý túrindegi jaza kózdelgen.

Aıta ketelik Atyraýda joǵalǵan otbasy jóninde tyń málimet taratqan haker Túrkııadan ekstradıtsııalanatyny týraly jazǵan edik.