Alaıaqtyq jasady degen kúdikpen izdeýde júrgen qazaqstandyq áıel Túrkııada ustaldy

ASTANA. KAZINFORM – Bas prokýratýra men Interpol Ulttyq ortalyq bıýrosy QR Syrtqy ister mınıstrliginiń járdemdesýimen Túrkııa Respýblıkasynan birneshe ret alaıaqtyq jasaǵany úshin halyqaralyq izdeýde júrgen Qazaqstan azamatyn elge qaıtardy.

Tergeý derekterine sáıkes, kúdikti 2024 jyly Qyzylorda qalasynda jábirlenýshilerge zergerlik buıymdardy tómen baǵamen satyp alyp berýge ýáde etip, aldaý jolymen olardyń aqshalaı qarajatyn ıemdengen.

Atalǵan qylmystyq áreketter saldarynan 8 adam japa shegip, keltirilgen materıaldyq zalaldyń jalpy somasy shamamen 130 mln teńgeni qurady.

- Qylmystardy jasaǵannan keıin kúdikti Qazaqstan aýmaǵynan tys jerge boı tasalap, halyqaralyq izdeý jarııalanǵan. Júrgizilgen izdestirý is-sharalary barysynda ol Túrkııa Respýblıkasynyń aýmaǵynda ustaldy, - delingen aqparatta.

Qazirgi ýaqytta kúdikti tergeý ızolıatoryna qamaldy. Oǵan taǵylǵan qylmystar úshin múlkin tárkileý arqyly bes jyldan on jylǵa deıin bas bostandyǵynan aıyrý jazasy kózdelgen.

Aıta keteıik, ótken jyly izdeýde júrgen 1600-ge jýyq qylmysker ustaldy.