Alaıaqtyq onlaın oıyndarǵa da jetti — polıtsııa
QYZYLORDA. KAZINFORM – Qyzylorda oblysynda jyl basynan beri ınternet alaıaqtyqtyń 422 deregi tirkeldi. Byltyr esepti kezeńde bul kórsetkish 222 bolǵan.
Oblystyq Polıtsııa departamenti halyq arasynda saqtyq sharalaryn úzbeı júrgizse de, alaıaqtardyń quryǵyna túskender azaımaı tur.
- Bul — jaı ǵana san emes, 422 adam aram nıettilerge aldanyp, mańdaı ter aqysynan aıyryldy degen sóz. Osy qylmysqa qatysty dropper, droppovod uǵymdary paıda boldy. Dropper qylmysqa kómek kórsetýshi nemese qatysýshy degen maǵynany bildiredi. Olardyń basym bóligi — jastar, ıaǵnı stýdentter men jumyssyzdar. Sebebi olar áleýmettik jelide kóp otyrady. Sondaǵy jalǵan jarnamalarǵa senip, bank kartalaryn nemese esepshottaryn alaıaqtarǵa beredi. Ádette alaıaqtar Instagram, Telegram, Facebook áleýmettik jelilerinde jumys usynady. Sharty op-ońaı, siz bankomat kartochkasyn nemese rekvızıtin beresiz, al sizge ár aýdarymnan 5 myńnan 50 myńǵa deıin aqsha tóleýge ýáde beredi. Shyn máninde qylmyskerler ony aldanǵan adamdardan nemese esirtiki aınalymynan túsetin zańsyz qarajatqa qol jetkizý úshin qoldanady, - dedi departamenttiń basqarma bastyǵynyń orynbasary Tımýr Hamıtov.
Al droppovod óz ortasynda «barlyǵy zańdy» degen jalǵan jeleýmen adamdardyń bank kartalaryn ıemdenedi nemese olardyń atynan banktik qosymshalar ashyp, qylmyskerlerge usynady.
Balalar bas kótermeı oınaıtyn «Free fier», «PUBG» sııaqty onlaın oıyndardy da baıqamasa bolmaıdy.
- Ony bir-birin tanymaıtyn adamdar bir júıede oınaı beredi. Oıyn barysynda bir-birimen sóılese alady. Oıynshylar arasyndaǵy alaıaqtar oıynǵa beıim balalarǵa «anańdy jaqsy kórseń, tosyn syı jasa» dep aldap habarlama jazady. Oıynǵa qajetti qural-saımany men kúshti keıipkerleri bar akkaýnt beretinin aıtyp, qyzyqtyra bastaıdy. Ári qaraı túnniń ekinshi jartysynda WhatsApp jelisi arqyly balaǵa jazyp, «ata-anań nemese ata-ájeń uıyqtaǵan bolsa, bildirmeı telefonyn, bank kartochkalaryn jasyryn alyp kel» dep nusqaý berip, ishindegi qarajattaryn urlaıdy, - dedi Tımýr Hamıtov.
Eske salsaq, elimizde sońǵy bes jylda 86 myń adam qarjy pıramıdasyna kirip, 37 mlrd teńgesinen aıyryldy.