Alaıaqtyq boıynsha izdeýde júrgen Qazaqstan azamaty Túrkııadan elge qaıtaryldy
ASTANA. KAZINFORM – Bas prokýratýra jáne Іshki ister mınıstrliginiń Interpol qyzmetkerleri Syrtqy ister mınıstrliginiń jáne Túrkııa Respýblıkasynyń quzyretti organdarynyń kómegimen birneshe ret alaıaqtyq boıynsha izdeýde júrgen Qazaqstan azamatyn Túrkııadan elge qaıtardy.
Ol 2023 jyly Shymkent qalasynda basqa adamdarmen aldyn ala sóz baılasyp, ınternet-alańda naryqtyq baǵadan tómen baǵamen avtokólik satylady degen jalǵan habarlandyrýlar ornalastyrǵan. Zańsyz áreketterdiń saldarynan 52 jábirlenýshi jalpy somasy 70 mln teńgeden astam qarajattan aıyryldy.
Atalǵan qylmystyń qatysýshylary buryn jazanyń ártúrli túrlerine sottalǵan. Qylmys jasaǵannan keıin kúdikti jasyrynǵanyna baılanysty oǵan halyqaralyq izdeý jarııalanyp, aǵymdaǵy jyldyń tamyz aıynda Túrkııa aýmaǵynda ustaldy.
Qazirgi ýaqytta kúdikti tergeý ızolıatoryna qamaldy. Ol múlki tárkilenip, úsh jyldan jeti jylǵa deıin bas bostandyǵynan aıyrylýy múmkin.
Bas prokýratýra men quqyq qorǵaý organdary azamattardyń quqyqtary men zańdy múddelerin qorǵaý jáne qylmys jasaǵan tulǵalardy, olar qaı elde júrgenine qaramastan, jaýaptylyqqa tartý boıynsha júıeli jumysyn jalǵastyrady.
Aıta ketelik kásipkerlerdi 126 mln teńgege aldaǵan alaıaq Qyrǵyzstanda ustaldy.