Alaıaqtyq, bopsalaý: Elimizdiń birneshe óńirinde jastardan qurylǵan qylmystyq toptar ustaldy

ASTANA. KAZINFORM – QR ІІM jastar arasyndaǵy qylmystyq toptardy anyqtaý jáne jolyn kesý boıynsha jumysty turaqty negizde júrgizip keledi, – dep habarlaıdy Polisia.kz.

Mundaı toptar kóbinese jasyryn qylmys jasaıdy, ıaǵnı jábirlenýshilerdi qorqytyp,-úrkitip, oılaǵan maqsattaryn júzege asyrady. «Urylar» ıdeologııasyn ustanyp, zańsyzdyqqa jol beretin toptar qoǵamdyq tártip pen azamattardyń quqyqtaryn óreskel buzady.

Jaqynda ǵana ІІM uıymdasqan qylmysqa qarsy kúres departamenti Shymkent jáne Pavlodar qalalarynda osyndaı eki toptyń ustalǵany týraly habarlaǵan bolatyn. Kúdiktiler qamaýǵa alynyp, tergeý júrgizilip jatyr.

– Bıyl qańtar aıynda basqa da birqatar óńirde osyndaı ustaý operatsııalary júrgizildi. Máselen, Shymkentte jedel aqparatty tekserý barysynda ýnıversıtetterdiń birinen úsh stýdentti urlaý faktisi anyqtaldy. Tekseris barysynda 20 jastaǵy alty jigit qylmyskerlerdiń yqpalymen birneshe ret adam bopsalap, ózge de qylmystar jasaǵany anyqtaldy. Osyndaı oqıǵalardyń birinde olar úsh stýdentti avtokólikke otyrǵyzyp, qalanyń syrtyna aparǵan, onda olar kúsh kórsetip, mobıldik qosymsha arqyly onlaın-nesıe resimdetken jáne 700 myń teńgeni tartyp alǵan. Toptyń barlyq qatysýshylary ustaldy.

Al Almaty oblysynda 23 jasqa deıingi úsh adamnan qurylǵan top ustaldy. Olar 2005 jyly týǵan qyzben kelise otyryp, adamdardy aldap páterge aparyp otyrǵan. Onda olar jábirlenýshilerdi kúsh kórsetemiz dep qorqytyp, aqsha bopsalaǵan. Kúdiktiler ustalyp, sottyń sanktsııasymen qamaýǵa alyndy.

Pavlodar oblysynyń Aqsý qalasynda bopsalaý jáne alaıaqtyq qylmystar jasaǵany úshin jastar toby ustaldy. Top músheleri qorqytý jáne aldaý arqyly jábirlenýshilerdi nesıe resimdeýge májbúrlegen, keıinnen aqsha men taýarlardy ıemdengen. Kúdiktiler ustalyp, qamaýǵa alyndy.

Aqmola oblysynda qylmystyq toptyń eki múshesi buryn jergilikti turǵynnan jarty mıllıon teńge bopsalaǵany anyqtaldy. Kúdiktilerdiń biri 2005 jyly týǵan jáne uqsas qylmystar jasaǵany úshin jazasyn ótep jatyr. Ekinshi kúdikti qamaýǵa alynyp, tergeý júrgizilýde.

Abaı oblysynda stýdentterdi qorqytý arqyly aqsha bopsalaýmen aınalysqan semeılik jas turǵyndardan quralǵan toptyń qylmystyq áreketi áshekrelendi. Jábirlenýshilerdiń biri – jergilikti únıversıtettiń ekinshi kýrs stýdenti, ótken jyldyń tamyz aıynan bastap qaskóılerge 700 myńnan astam teńge bergen. Kúdikti qamaýǵa alyndy. Atyraýda jastar tobynyń múshesine qatysty jedel aqparatty tekserý nátıjeleri boıynsha eki sholaq myltyq jáne ártúrli kalıbrli 60 patron tárkilendi. Ol 2005 jyly týǵan kolledj stýdenti, – dedi QR ІІM uıymdasqan qylmysqa qarsy kúres departamentiniń basqarma bastyǵy Qýandyq Alpys.

Jastar arasyndaǵy qylmystyń aldyn alý Іshki ister mınıstrligi basshylyǵynyń erekshe baqylaýynda tur.