Alaıaqtyq baby boıynsha izdeýde bolǵan NEF Qazaqstan basshysy ustaldy
ALMATY. KAZINFORM — Qazaqstan Respýblıkasynyń Іshki ister mınıstrligi izdeýde bolǵan NEF Qazaqstan basshysy Taryk Volkan Oskaıdyń ustalǵanyn rastady.
Bıyl sáýir aıynda Almaty qalasy Bostandyq aýdanynyń polıtsııa basqarmasy Túrkııalyq Nef qurylys holdınginiń qazaqstandyq ókildigi — NEF Qazaqstan-nyń 52 jastaǵy basshysyna qatysty alaıaqtyq deregi boıynsha qylmystyq is qozǵaǵany belgili boldy.
Taryk Volkanǵa qatysty joldaǵan saýalymyzǵa jaýap bergen Іshki ister mınıstrligi onyń ustalǵanyn rastady.
— Almaty qalasy polıtsııa departamenti bul derek boıynsha Qazaqstan Respýblıkasy Qylmystyq kodeksiniń 190-babynyń 4-bóligi («Alaıaqtyq») boıynsha sotqa deıingi tergep-tekserý júrgizip jatyr. Tergeý aıasynda istiń barlyq mán-jaıyn tolyq, jan-jaqty jáne obektıvti anyqtaý úshin sharalar qabyldanyp jatyr. Qazaqstan Respýblıkasy Qylmystyq-protsestik kodeksiniń (QPK) 201-babyna sáıkes, sotqa deıingi tergep-tekserý derekteri jarııa etilmeıdi, — delingen ІІM jaýabynda.
Sondaı-aq ІІM kúdiktini elge ekstradıtsııalaý máselesi Qazaqstan Respýblıkasynyń Bas prokýratýrasynyń quzyretinde ekenin atap ótti.
Eske salaıyq, 2022 jyly Astana International Exchange (AIX) alańy NEF Qazaqstan kompanııasynyń 6 mlrd teńge kóleminde alǵashqy oblıgatsııalaryn ornalastyrǵanyn málimdegen bolatyn. Alaıda, 2023 jyly kompanııa AIX platformasynda alǵash ret defoltqa jol berdi — ol 4 mlrd teńgeden asatyn negizgi qaryzdy, sondaı-aq 402 mln teńge kólemindegi kýpondyq tólemdi óteý boıynsha óz mindettemelerin oryndaı almaǵan.
Buǵan deıin Bas prokýratýra Astana LRT kompanııasynyń burynǵy basshysy Talǵat Ardandy ekstradıtsııalaý protsesine qatysty resmı jaýap berdi.