Alaıaqtyq áreketterdiń 67 paıyzy jalǵan ınvestıtsııalar men onlaın-dúkenderge qatysty – Antıfrod-ortalyq
ALMATY. KAZINFORM – Almatyda alaıaqtyq árekettermen kúres qalaı júrip jatyr? Bul suraqqa Ulttyq tólem korporatsııasy Antıfrod-ortalyqtyń alaıaqtyq áreketterge qarsy is-qımyl departamentiniń dırektory Aınur Izmaılova jaýap berdi.
Onyń aıtýynsha, Antıfrod-ortalyqtyń platformasy 2024 jylǵy 22 shildede iske qosylǵan. Ol kúmándi tranzaktsııany anyqtap, aldyn alý úshin qarjy uıymdary men quqyq qorǵaý organdarynyń ózara jedel baılanysyn qamtamasyz etedi.
- Ortalyq alaıaqtyqqa nazar aýdaryp qana qoımaı, alaıaqtyqtyń júıesin anyqtaýdyń negizin de qalyptastyrady. Negizgi tetik – derekter almasý men jalpyulttyq «qara» jáne «sur» tizimderdi qalyptastyrý, bul alaıaqtyqty jolyn aldyn ala toqtatýǵa múmkindik beredi, - dedi ol.
Aınur Izmaılova 2026 jyldyń aqpan aıyna deıin Antıfrod-ortalyqta 111 031 oqıǵa tirkelgenin atap ótti. Onyń ishinde 90 myńy alaıaqtyq árekettermen baılanysty. Aqparattyń 52%-y ishki ister organdarynan, 48%-y qarjy naryǵyna qatysýshylardan kelip túsken.
- Eń keń taraǵany – jalǵan ınvestıtsııalar, aldap qońyraý soǵý men jalǵan onlaın-dúkender eken. Ol alaıaqtyqtyń 67%-yn qurady. 2026–2028 jyldarǵa arnalǵan strategııalyq damý aıasynda qarjylyq aktıvtermen, krıptovalıýtalarmen jáne marketpleıstermen jasalatyn operatsııalardy qosa alǵanda, tsıfrlyq alaıaqtyqtyń aldyn alý men tergep-tekserýge baǵyttalǵan ulttyq antıfrod-kontýrdy qurý kózdelgen, – dedi Aınur Izmaılova.
Eske salaıyq, Qyzylordada alaıaqtyq isi boıynsha 406 dropper anyqtaldy.