Alaıaqtarǵa sengen aqtóbelikti raıynan qaıtarý úshin eki saǵat ýaqyt kerek bolǵan
AQTÓBE. KAZINFORM — Bank menedjeri nesıe rásimdep, aqshasyn alaıaqqa bermek bolǵan aqtóbelik týraly aqparatty polıtsııaǵa habarlaǵan. Polıtsııa turǵynmen eki saǵat boıy áńgimelesip, áreń kóndirdi.
Oqıǵa Aqtóbe qalasynda tirkeldi. Ekinshi deńgeıli bank menedjeri nesıe rásimdemek bolǵan adamnyń qobaljyp, qaıta-qaıta telefonǵa qarap otyrǵanyn kóredi. Sol kezde mán-jaıdy suraǵanymen, aldynda otyrǵan klıent bárin joqqa shyǵarǵan.
— Bankke klıent kelip, 2 mln teńge nesıe rásimdemek boldy. Ol jóndeý jumystaryn júrgizýge aqsha qajet dep aıtty. Suranys berdi, bank maquldady. Beınebaılanysqa shyǵyp, rastaý qajet bolǵan kezde telefon nómirine habarlama keldi. Ol jerde bizdiń bank atalǵan eken. Sol kezde alaıaqtar bolýy múmkin degen kúdikpen basshylarǵa habar berdim. Olar qaýipsizdik qyzmetine habarlap, polıtsııaǵa tapsyrdy, — dedi bank menedjeri Zarına Ermaǵambetova.
Qyraǵylyq tanytqan bank qyzmetkerine Aqtóbe oblysynyń prokýrory atynan alǵys hat tabystaldy.
Aqtóbe oblystyq PD Kıberqylmysqa qarsy is-qımyl basqarmasynyń jedel ýákili Jánibek Shagırovtyń aıtýynsha, jyl basynan beri óńirde 317 ınternet alaıaqtyǵy deregi tirkeldi.
— Polıtsııa qyzmetkerleri eki saǵat boıy túsindirý jumysyn júrgizdi. Ol uzaq ýaqyt boıy ózine ІІM, Ulttyq bank qyzmetkeri habarlasty dep senimdi otyrdy. Telefonyn kórsetpeı, qarsy shyqty. Basy aınalyp qalǵan adamdaı. Keıin bárin túsirgen soń jylap, alǵysyn aıtty. Shyǵyn bolmaǵan soń qylmystyq is tirkelmedi ári bank klıenti aryz jazbady, — dedi Jánibek Shagırov.
Aıta keteıik, Іshki ister mınıstrligi jasandy ıntellekttiń zamanaýı tehnologııalaryn qoldanýmen baılanysty ınternet-alaıaqtyqtyń jańa túri anyqtalǵanyn málimdedi. Halyk+ dep atalatyn ınvestıtsııalyq platformanyń kómegimen iri kólemde aqsha tabýǵa bolady degen jalǵan aqparat aıtylady.
