Alaıaqtarǵa aýdarylǵan aqshany qalaı qaıtaryp alýǵa bolady

ASTANA. KAZINFORM – Almaty qalasynyń prokýratýrasy dropperlerden keltirilgen zalaldy qalaı óteýge bolatyny jóninde nusqaýlyq jarııalaǵan. 

Dropper — alaıaqtar aqsha alý úshin paıdalanatyn adam. Ádette, bank shottary, kartochkalar arqyly aýdarym jasalady nemese urlanǵan qarajat qolma-qol aqshaǵa aınalady.

— Óndirip alýdyń mundaı múmkindigi negizsiz baıytý kezinde qarajat pen múlikti qaıtarý mindetin kózdeıtin Azamattyq kodeksiniń 953-babymen reglamenttelgen, — delingen Almaty qalasynyń prokýratýrasy habarlamasynda.

Naýryzbaı aýdandyq sotynyń sheshimimen jábirlenýshiniń dropperlerden 3 mıllıon teńge mólsherinde zalal somasyn óndirip alý týraly talaby qanaǵattandyryldy.

Talap aryz berý úshin mynadaı qujattar qajet:

• qylmystyq isti SDTB-ne engizý týraly baıanattyń kóshirmesi;
• jábirlenýshini taný týraly qaýlynyń kóshirmesi;
• bankten adamnyń shotyna aqsha qarajatyn aýdarý týraly jaýap;
• shotyna aqshalaı qarajat túsken adamnan jaýap alý (dropperler).

— Eger siz ınternet-alaıaqtyqtyń qurbany bolsańyz, qosymsha suraqtar boıynsha prokýratýra organdaryna júginýge quqyǵyńyz bar. Almaty qalasynyń prokýratýrasy azamattardy muqııat bolýǵa jáne ózderiniń banktik kartalarynyń derekteri men kirý kodtaryn bógde adamdarǵa bermeýge shaqyrady, — delingen habarlamada.

Aıta ketelik byltyr «dropperlerden» 1 mlrd teńge óndirip alynǵan edi.