Alaıaqtarǵa aldanǵan BQO turǵyndary 100 mln teńgesinen aıyryldy

ORAL. KAZINFORM – Batys Qazaqstan oblysynda tek qańtar aıynda alaıaqtarǵa aldanǵan turǵyndar 100 mln teńgesinen aıyryldy.

BQO polıtsııa departamentiniń baspasóz qyzmetinen málim etkenindeı, solardyń ishinde Báıterek aýdanynda turatyn erli-zaıyptylar bar. 

Alaıaqtar úsh kún boıy olardyń senimine kirip, sońynda er adamǵa áıel qońyraý shalyp, tabys tabý jáne qaryzdardy tóleý boıynsha kómek usynǵan. Aldymen alaıaqtar 47 250 teńge aýdarýdy suraǵan. Únemi beıneqońyraýlar men aqsha aýdarý boıynsha nusqaýlar nátıjesinde erli-zaıyptylar nesıeler alyp, alaıaqtardyń esepshottaryna aqsha aýdarǵan. Shyǵyn somasy 9 mıllıon teńgeden asty. 

- Sondaı-aq zeınetkerler kompanııa qyzmetkerleri bolyp qońyraý shalǵan alaıaqtardyń qurbany boldy. Qońyraý shalýshylar olardyń SIM-kartasynyń jaramdylyq merzimi aıaqtalǵanyn aıtyp, ony uzartý úshin Aitu_Pass qosymshasynan kelgen kodty aıtýdy suraǵan. Osydan keıin bank qyzmetkeri bolyp ózin tanystyrǵan alaıaq qońyraý shalyp, zeınetkerdiń atyna nesıe rásimdeletinin habarlaǵan. Nátıjesinde alaıaqtar zeınetkerlerdiń depozıtterine qol jetkizip, 11 mıllıon teńgeden astam aqshany ıemdengen. Polıtsııa turǵyndarǵa abaı bolyp, kúmándi qońyraýlarǵa senip qalmaý, jeke derekterdi bermeý kerektigin eske salady, - dep habarlady.

Eske sala keteıik, budan buryn Qazaqstannyń batysynda esirtki jetkizý arnalary joıylǵanyn jazǵan edik.