Alaıaqtarǵa aldanǵan aqtóbelikter 1 mlrd teńge aqshasynan aıyryldy

AQTÓBE. KAZINFORM – Aqtóbe oblysynda bıyl 700-ge jýyq alaıaqtyq deregi tirkeldi. Shyǵyn 1 mlrd teńgeden asty.

Aqtóbede áli de ınternet alaıaqtarǵa aldynyp jatqandar bar. Mundaı derek kún saıyn tirkeledi. Kóbi 1414 nómirinen kelgen habarlamaǵa senip, qupııa kodty aıtyp beredi.

– Aqtóbe oblysy boıynsha 700-ge jýyq qylmystyq is tirkeldi. Qazir 203 qylmystyq is aıaqtylyp, sotqa jiberildi. Turǵyndarǵa keltirilgen shyǵyn 1 mlrd teńgeden asady. Aqtóbe qalalyq polıtsııa basqarmasynyń Kıberpol qyzmetkerlermen birge 18,7 mln teńge qaıtaryldy. Sonymen birge 150-ge jýyq bank esepshoty buǵattaldy, - dedi Aqtóbe oblystyq PD krımınaldyq polıtsııa basqarmasynyń aǵa jedel ýákili Baqdáýlet Balmýrzın.

Onyń aıtýynsha, zat satyp alý úshin belgisiz siltemege ótip, aqshasynan aıyrylyp qalǵandar kóp. 

– QR kod arqyly tólegende de abaı bolý kerek. Sonymen birge ońaı jolmen aqsha tappaq bolyp, ınvestıtsııa salady. Aqshany eseleımin dep 4-5 aı boıy aldynyp júredi, keıin polıtsııadan kómek suraıdy. Polıtsııa, UQK, Ulttyq bank qyzmetkerleri áleýmettik jeli arqyly qońyraý shalmaıdy. Osyny da este ustaý kerek, - dedi Baqdáýlet Balmýrzın. 

Eske salsaq, Aqtóbede aqshasyn jınap júrgen zeınetkerler de aldanyp jatyr.