Alaıaqtardyń eń basty quraly – adam psıhologııasy

ASTANA. KAZINFORM – Qazir ınternet alaıaqtary aılasyn asyrý úshin túrli ádisterdi paıdalanady. Eń qaýiptisi – adam psıhologııasyna áser etý arqyly jasalatyn alaıaqtyq áreketteri.

Bul týraly QR Jasandy ıntellekt jáne tsıfrlyq damý mınıstrliginiń mamany «Búgin LIVE» baǵdarlamasyna bergen suhbatynda aıtty.

– Qazirgi kıberqaýipsizdik salasynda fıshıng, áleýmettik ınjenerııa, DDoS jáne Ransomware shabýyldary jıi kezdesedi. Alaıda bulardyń bári jaı quraldar ǵana. Kıberqaýipsizdiktegi eń osal tus – adamnyń psıhologııasy. ıAǵnı adamnyń psıhologııasyna áser etý arqyly kıbershabýyldar nátıjege jetedi. 7– 8 jyl buryn aqparattyq qaýipsizdik tek tehnologııalarǵa jasalatyn shabýyldarmen shektelse, qazir ol adamnyń sana-sezimine, otbasyna jáne jaqyn týystaryna áser etý arqyly júzege asatyn bolyp otyr, – deıdi Derbes derekterdi qorǵaýdy damytý boıynsha basqarma basshysy Yrysty Jálilhanova.

Mınıstrlik mamany ınternet alaıaqtarynyń eń jıi taraǵan ádisterin jeke-jeke toqtaldy.

– Mysaly, fıshıng – alaıaqtardyń adamdy aldaý, qorqytý jáne senimimen oınaý arqyly júzege asyratyn tásili. DDoS shabýyldary aqparattyq júıege myńdaǵan suranys jasap, qurylǵyny qalypty jumysynan aıyrady. Al áleýmettik ınjenerııa – adam psıhologııasynyń osaldyǵyn paıdalanatyn ádis. Ondaǵy maqsat – adamdy qorqytý, agressııaǵa jetkizý sııaqty psıhologııalyq áreketter jasaý arqyly adamdardy aldaý, – deıdi ol.

Aıta keteıik, Almaty qalasynyń polıtsııa departamenti turǵyndardy ınternet-alaıaqtyqtyń jańa túri týraly aıtyp berdi.