Alaıaqtardyń arbaýyna túspeńiz: ІІM shetelge jumysqa ketetinderge eskertý jasady
ASTANA. KAZINFORM — Іshki ister mınıstrligi ınternette jarııalanatyn habarlandyrýlar arqyly azamattardy sheteldegi «jalaqysy joǵary jumysqa» tartý derekteri kóbeıgenin aıtyp, mundaı usynystardyń qaýipti bolýy múmkin ekenin eskertti.
ІІM-niń kıberqylmysqa qarsy is-qımyl departamentiniń málimetinshe, alaıaqtar áleýmettik jelilerde, messendjerler men túrli habarlandyrý saıttarynda tabysy joǵary, jol aqysy men jatyn orny tegin, tájirıbe men til bilýdi talap etpeıtin ońaı jumys usynamyz dep habarlandyrý jasaıdy.
Mundaı habarlandyrýlar kóbine Telegram-daǵy arnalarda, WhatsApp toptarynda jáne ózge de onlaın alańdarda taratylady. Alaıda shetelge barǵan azamattar is júzinde múlde basqa jaǵdaıǵa tap bolýy múmkin:
- jeke kýáligi men ózge de qujattarynyń qoldy bolýy;
- erkin júrip-turý múmkindiginiń shektelýi;
- ınternet arqyly jasalatyn alaıaqtyq shemalarǵa kúshtep tartylý;
- ýáde etilgen jalaqynyń berilmeýi;
- «bosatyp jiberý» nemese elge qaıtarý úshin aqsha talap etý;
- qysym kórsetý, qorqytý.
Saqtyq úshin mynalardy eskergen jón:
- shetelge jumysqa tek resmı tirkelgen, lıtsenzııasy bar agenttikter arqyly baryńyz;
- jumys berýshi týraly málimetti jáne kelisimshart talaptaryn jan-jaqty tekserińiz;
- qujattaryńyz ben jeke derekterińizdi beıtanys adamdarǵa senip tapsyrmańyz;
- sapar baǵyty men baratyn jerińiz týraly jaqyndaryńyzǵa aldyn ala habar berińiz.
- Eger kúmándi usynys alsańyz nemese alaıaqtyq belgilerin baıqasańyz, birden quqyq qorǵaý organdaryna júgingen durys.
Vedomstvo ókilderi azamattardy qyraǵy bolýǵa jáne ınternettegi kúmándi usynystarǵa senbeýge shaqyrdy.
Buǵan deıin semeılik alaıaq halyqqa páter alýǵa kómektesemin dep 20 mln teńgeden asa paıda tapqanyn jazǵanbyz.