Alaıaqtardy qalaı aınalyp ótýge bolady – sarapshy pikiri
ASTANA.KAZINFORM – Sońǵy ýaqytta ınternet alaıaqtary jeke derekter men akkaýnttarǵa qol jetkizýdiń jańa tásilderin qoldana bastaǵan. Osyǵan baılanysty zańger Abzal Bekbosynov Jibek Joly telearnasynyń «Búgin Live» baǵdarlamasynda qaýiptiń negizgi belgileri men saqtyq sharalaryn túsindirdi.
– Alaıaqtardyń ádisi boıynsha paıdalanýshyǵa «Telegram qoldaý qyzmetinen» habarlama keledi. Onda «Sizdiń akkaýntyńyzdy joıý týraly suraý tústi, eger bul siz bolmasańyz, 24 saǵat ishinde myna batyrmany basyp, áreketti toqtatyńyz» dep jazylady. Bul – psıhologııalyq qysym. Adam akkaýntynan aıyrylyp qalýdan qorqyp, asyǵys sheshim qabyldaıdy. Siltemege ótken kezde sizden rastaý kodyn engizý suralady. Kodty jazǵan sátte alaıaqtar akkaýntyńyzdy tolyq baqylaýǵa alady. Olar sizdiń atyńyzdan jaqyndaryńyzdan aqsha suraýy nemese jeke derekterińizdi óz maqsattaryna paıdalanýy múmkin, – dedi spıker.
Maman mundaı jaǵdaıǵa tap bolǵanda birden áreket etý qajettigin atap ótti.
– Aldymen skrınshot jasap, kúmándi siltemelerdi buǵattaý kerek. Eki faktorly aýtentıfıkatsııany qosý qajet. Sonymen qatar kıberpolıtsııaǵa nemese jergilikti polıtsııaǵa júginý kerek. Eger bank shottaryna qatysty kúmán týyndasa, olardy da buǵattaǵan jón, – dedi ol.
Sarapshynyń aıtýynsha, qazirgi tańda alaıaqtyq tek qarapaıym tásildermen shektelmeı, shetelden basqarylatyn kúrdeli kıberqylmys túrine aınalyp otyr.
– Jaqynda Qazaqstannyń ІІM Ýkraına polıtsııasymen birlesip, osyndaı qylmystyq toptardy anyqtap, quryqtady. Sondyqtan ınternet keńistiginde barynsha saq bolý qajet, – dedi Abzal Bekbosynov.
Eske salaıyq, Qazaqstan kıberpolıtsııasy 2025 jyly shetelde 7 call-ortalyqty joıdy.
