Alaıaqtardy anyqtaý jumystary kúsheıtildi - Bas prokýratýra
ASTANA. KAZINFORM – 200-den astam dropper sottaldy. Bul týraly Kazinform agenttiginiń BIZDIÑ ORTA podkastynda QR Bas prokýrorynyń orynbasary Jandos Ómirálıev aıtty.
– Buryn qylmyskerler bireýdiń múlkin kúsh qoldanyp tartyp alsa, qazir olar smartfon men kompıýterdi qural retinde paıdalanady. Internet alaıaqtyq tásilderi ártúrli bolyp otyr. Bul baǵytta azamattardyń qarajatyn jymqyrý derekteri az emes. 2024–2025 jyldar aralyǵynda 5 myńnan astam adam qylmystyq jaýapkershilikke tartylyp, sottaldy. Onyń ishinde 453 ınternet-alaıaq, 85 kıberqylmystyq top anyqtaldy, 200-den astam dropper sottaldy. Dropper dep alaıaqtarǵa kómektesip, óz shottary men kartalaryn paıdalanýǵa bergenderdi ataımyz, – dedi J. Ómirálıev.
Onyń aıtýynsha, ishki ister organdary bul baǵytta arnaıy qurylymdar quryp, jumysty kúsheıtip otyr. Prokýratýra men polıtsııa bul jumysty birlesip júrgizip jatyr. Parlamentte zańnamalyq ózgerister qarastyrylǵan. Bul rette uıaly baılanys operatorlary men bankterdiń de jaýapkershiligin arttyrýǵa erekshe nazar aýdarylǵan.
Eske salsaq, jaqynda Almaty oblysynda 19 jastaǵy jigit basqarǵan dropperler toby ustaldy.
Elimizde ınternet alaıaqtarǵa qurbandyq taýyp beretin dropperlerge qylmystyq jaza kúsheıtiledi.