Alaıaqtardan saqtan: Telegram-dy buzýdyń jańa shemasy shyqty
ASTANA. KAZINFORM – Bas prokýratýranyń janyndaǵy Qylmystyq qaýip-qaterlerdi boljaý ortalyǵy Telegram qoldanýshylaryna shuǵyl eskertý jasady. Qazirgi ýaqytta messendjerde akkaýnttardy qoldy qylýdyń jańa aılasy tarap jatyr.
Alaıaqtardyń ádisi:
Paıdalanýshyǵa «Telegram qoldaý qyzmetinen» habarlama keledi. Onda «Sizdiń akkaýntyńyzdy joıý týraly suraý tústi, eger bul siz bolmasańyz, 24 saǵat ishinde myna batyrmany basyp, áreketti toqtatyńyz» dep jazylady. Bul — psıhologııalyq qysym. Adam akkaýntynan aıyrylyp qalýdan qorqyp, asyǵys sheshim qabyldaıdy.
Ármen qalaı ne bolady?
Siltemege ótken kezde sizden rastaý kodyn engizý suralady. Kodty jazǵan sátte alaıaqtar akkaýntyńyzdy tolyq baqylaýǵa alady. Olar sizdiń atyńyzdan jaqyndaryńyzdan aqsha suraýy nemese jeke derekterińizdi óz maqsattaryna paıdalanýy múmkin.
Este saqtańyz:
Telegram-nyń resmı qoldaý qyzmeti eshqashan paıdalanýshylardan úshinshi tarap bottary nemese kúmándi siltemeler arqyly rastaý kodtaryn, qupııasózderdi nemese akkaýntqa kirýge qajetti ózge de derekterdi suramaıdy.
Akkaýntty baqylaýǵa alǵannan keıin alaıaqtar hat-habarlardy oqýǵa, jeke derekterge qoljetimdilik, akkaýnt ıesiniń atynan habarlamalar jiberýge, kontakttardan aqsha aýdarýdy suraýǵa, akkaýntty basqa alaıaqtyq shabýyldar úshin paıdalanýǵa múmkindik alady.
Alaıaqtyq habarlamanyń negizgi belgileri:
- jiberýshi ózin qoldaý qyzmetiniń ókili retinde tanystyrady, biraq resmı rastalǵan mártebesi joq;
- habarlamada shuǵyl túrde silteme arqyly ótýdi nemese botty paıdalanýdy talap etedi;
- paıdalanýshydan SMS nemese Telegram arqyly kelgen rastaý kodyn engizýdi suraıdy;
- akkaýntty joǵaltý qaýpi men asyǵystyq sezimin qalyptastyrady;
- habarlama jiberýshiniń akkaýnty jaqynda qurylǵan, ataýyn ózgertken nemese kúmándi belgileri bar;
- mátinde oǵash tujyrymdar, qateler nemese kúmándi siltemeler kezdesedi.
Akkaýntty qorǵaý úshin kelesi is-sharalar usynylady:
- rastaý kodtary men qupııasózderdi eshkimge habarlamańyz;
- kúmándi habarlamalardaǵy siltemelerge ótpeńiz;
- Telegram derekterin bógde paraqshalarda nemese bottarda engizbeńiz;
- qosymshanyń baptaýlarynda eki kezeńdi aýtentıfıkatsııany qosyńyz;
- «Qurylǵylar» bólimindegi belsendi seanstardy turaqty túrde tekserińiz;
- belgisiz nemese kúmándi qosylymdardy aıaqtańyz;
- aqparatty tek Telegram-nyń resmı arnalarynan jáne baptaýlarynan alyńyz.
Eske sala keteıik, buǵan deıin Bas prokýratýra alaıaqtardy anyqtaý úshin jasandy ıntellektini iske qosqanyn jazǵanbyz.
