Alaıaqtardan qoryqqan aqtóbelik 22 mln teńgesinen aıyryldy

AQTÓBE. KAZINFORM — Aldanǵan áıel 2 bólmeli páterin satyp, nesıe de rásimdegen. Qazir kúdiktini izdeý jumysy júrip jatyr.

Aldymen Sybaılas jemqorlyqqa qarsy kúres jumystaryn júrgizetin agenttikten tekseris kelgeni jáne jaqyn arada ózine habarlasatyny týraly habarlama keledi. Habarlama kásiporyn basshysynyń nómirinen túsken. Kóp uzamaı ózin Sybaılas jemqorlyqqa qarsy kúres qyzmetkeri retinde tanystyrǵan belgisiz adamdar qońyraý shalyp, onyń bank shottaryn alaıaqtar paıdalanyp júrgenin aıtady. Aqshany saqtap qalý, qylmystyq áreketterdiń aldyn alý úshin olardyń nusqaýyn oryndaýdy talap etedi.

— Alaıaqtardyń sózine sengen áıel óziniń eki bólmeli páterin satyp, bankterden onlaın nesıe rásimdep, depozıtindegi 1 mıllıon teńgeni belgisiz bank kartalarynyń shottaryna aýdarǵan. Nátıjesinde keltirilgen jalpy shyǵyn 22 mıllıon teńgeden asty. Quqyq qorǵaý organdarynyń qyzmetkerleri aqsha aýdarýdy, nesıe rásimdeýdi nemese basqa da qarjylyq operatsııalardy talap etpeıdi. Kúdik týdyrǵan jaǵdaıda birden áńgimeni toqtatyp, polıtsııa bólimine júginińiz nemese 102 nómirine qońyraý shalyńyz, — dep habarlady oblystyq PD baspasóz qyzmeti.

Aıta keteıik, bıyl elimizde 14 myńnan astam ınternet-alaıaqtyq tirkeldi, bul ótken jyldyń tıisti kezeńimen salystyrǵanda 22%-ǵa kóp.