Alaıaqtardan qorǵaný: polıtseıler elordalyqtarǵa túsindirý jumysyn júrgizip jatyr
ASTANA. KAZINFORM – Elordanyń saýda oıyn-saýyq ortalyqtarynda 18-20 aqpan kúnderi alaıaqtyqqa qarsy kıberqylmystardyń aldyn alý sharalary ótip jatyr. Іs-sharany elordalyq polıtsııa departamenti uıymdastyrdy, dep habarlaıdy qala ákimdiginiń resmı saıty.
Polıtsııa qyzmetkerleri halyqty kıberqylmys túrlerimen tanystyryp, olardyń qarjylyq saýattylyǵyn arttyrý maqsatynda túsindirme jumystaryn júrgizedi.
Sarapshylar qurylǵy qaýipsizdigin únemi jańartyp otyrýdyń, senimdirek qupııa sózderdi paıdalanýdyń jáne qorǵalmaǵan ınternet jelilerine qosylý kezinde abaı bolýdyń mańyzdylyǵyn atap ótti.
Astananyń polıtsııa departamenti eriktilerdi tarta otyryp, alaıaqtardan saqtandyratyn kitapshalardy taratý boıynsha túsindirý júrgizip jatyr.
— Jedel-izdestirý is-sharalary barysynda 5 alaıaqtyq shema, sondaı-aq buryn jasalǵan 10 qylmys ashyldy. Aldyn alý maqsatynda eskertý materıaldaryn jappaı taratý uıymdastyryldy. Qala kóshelerinde úgit-nasıhat jumystary júrgizilýde. Naýqanǵa volonterlar, blogerler, BAQ ókilderi men tanymal tulǵalar jumyldyryldy, - dep atap ótti kıberqylmyspen kúres basqarmasynyń bastyǵy, polıtsııa podpolkovnıgi Talǵat Bólegenov.
Sondaı-aq ol alaıaqtyq shemalardyń jıi kezdesetin túrlerin atady.
— Eń kóp kezdesetinder: bankterdiń, quqyq qorǵaý organdarynyń, Ulttyq qaýipsizdik komıtetiniń, uıaly baılanys operatorlarynyń qaýipsizdik qyzmeti mamandarynyń atynan qońyraýlar. Olar sondaı-aq WhatsApp messendjeriniń akkaýnttaryn buzady, sodan keıin jábirlenýshiniń atynan qaryzǵa aqsha berýdi ótinetin habarlamalar jibere bastaıdy. OLX.kz, Satu.kz saýda alańdary arqyly taýar nemese qyzmet satatyndar alaıaqtardyń kózine jıi túsedi. Munda alaıaqtar kóbinese taýar úshin avanstyq tólemdi aýdarýdy nemese ony jetkizý siltemesin oryndaýdy suraıdy. Instagram, TikTok áleýmettik jelileri arqyly taýarlardy satý alaıaqtardyń súıikti orny ekenin atap ótkim keledi. Ádette, akkaýnttardyń jalǵan nusqalary ashylady, onda olar taýardyń tolyq qunyn tóleýdi suraıdy. Alaıaqtar jurtty krıptovalıýta men baǵaly qaǵazdarǵa ınvestıtsııalaýǵa da jıi tartady, - dep eskertti Talǵat Bólegenov.
Eske sala keteıik, buǵan deıin ınternet alaıaqtaryna aldanǵandardyń aqshasyn alyp, ózgelerge aýdarǵan aqtóbelik ustalǵanyn habarlaǵan edik.