Alaıaqtardan 5,5 mlrd teńge buǵattaldy — ІІM
ASTANA. KAZINFORM — Ulttyq banktiń Antıfrod-ortalyǵy qatysýshylarymen ózara is-qımyl kúmándi operatsııalardy barynsha jedel anyqtaýǵa jáne urlanǵan qarajattyń odan ári ketýine jol bermeýge múmkindik berip otyr.
Bul týraly QR ІІM Kıberqylmysqa qarsy is-qımyl departamentiniń bastyǵy Jandos Súıinbaı Ortalyq kommýnıkatsııalar qyzmetinde ótken brıfıngte aıtty.
— Eseptik kezeńde 212 myń ıntsıdent qalyptasty, onyń 76 myńnan astamyna ishki ister organdary bastamashylyq etti, — dedi departament basshysy.
Onyń aıtýynsha, nátıjesinde aqsha aýdarýshylardyń shottaryndaǵy 4 mlrd teńge, al droptardyń shottaryndaǵy 1,5 mlrd teńge buǵattaldy. Jábirlenýshilerge óz erkimen 617 mln teńge qaıtaryldy.
Spıker quqyq qorǵaý organdary men qarjy sektory arasyndaǵy jedel aqparat almasý óte mańyzdy ekenin atap ótti. Onyń sózinshe, is-qımyl jyldamdyǵy azamattardyń aqshasyn saqtap qalýǵa jáne qaıtarýǵa tikeleı áser etedi.
Sonymen qatar ótken jáne aǵymdaǵy jyly memlekettik organdarmen birlesip birqatar zańnamalyq jáne uıymdastyrýshylyq sheshim iske asyrylǵan. Atap aıtqanda, onlaın-qaryzdardy rásimdeý jáne SIM-kartalardy tirkeý kezinde tutynýshylyq kredıt berý talaptary kúsheıtildi.
— Ótken aptada Memleket basshysy biz ázirlegen «Eýropa Keńesiniń kıberqylmysqa qarsy konventsııasyn ratıfıkatsııalaý týraly» Zańǵa qol qoıdy. Ol konventsııaǵa qatysýshy eldermen jedel ózara is-qımyl jasaýǵa jáne aqparat almasýǵa múmkindik beredi, — dedi Jandos Súıinbaı.
Budan bólek, «BUU-nyń kıberqylmysqa qarsy konventsııasyn ratıfıkatsııalaý týraly» zań jobasy ázirlenip, Quryltaıdyń qaraýyna usynyldy.
Departament basshysynyń sózinshe, qabyldanǵan sharalar jedel jaǵdaıdy turaqtandyryp, ınternet-alaıaqtyqty tirkeý kórsetkishin tómendetýge múmkindik berdi.
— Árbir keltirilgen zalaldyń artynda qaskúnemder paıdalanýǵa tyrysatyn naqty adam, otbasy jáne senim bar ekenin túsinemiz, — dep qorytyndylady ol.
Aıta keteıik, buǵan deıin úsh aıda 1595 kıberqylmys anyqtalǵanyn jazǵanbyz.
