Alaıaqtar JI kómegimen tanymal tulǵalardyń beınesin paıdalanyp júr – ІІM
ASTANA. KAZINFORM — Іshki ister mınıstrligi azamattardy dıpfeık tehnologııalary men jalǵan brokerler arqyly jasalatyn ınternet-alaıaqtyqtan saq bolýǵa úndep, kúmándi ınvestıtsııalyq usynystarǵa senbeýge keńes berdi.
Vedomstvonyń habarlaýynsha, keıingi ýaqytta Qazaqstan Respýblıkasynyń aýmaǵynda túrli jobalarǵa ınvestıtsııa salý jáne aqsha engizý syltaýymen jasalatyn ınternet-alaıaqtyq faktileri jıilep ketti.
Qaskóıler messendjerler men áleýmettik jelilerde dıpfeık (jasandy ıntellekt) tehnologııalaryn paıdalanyp, tanymal tulǵalardyń beınelerin qoldaný arqyly azamattardy túrli ınvestıtsııalyq joba men qorǵa qarajat salýǵa úgitteıdi.
— Bul rette olar azamattarǵa jyldam ári kepildendirilgen tabys tabýǵa ýáde beredi. Jalǵan brokerlermen baılanysqa shyqqan kezde olar mobıldi qoldanbalardy ornatýdy, siltemelerge ótýdi nemese aqshany «ınvestıtsııa», «akkaýntty tirkeý» ne «tabysty ulǵaıtý» degen jeleýmen úshinshi tulǵalardyń shottaryna aýdarýdy usynady. Ádette aqsha aýdarylǵannan keıin jalǵan brokerlermen baılanys úzilip, ýáde etilgen tabys túspeıdi. Keıbir jaǵdaılarda alaıaqtar «salyqtardy», «alymdardy» nemese «saqtandyrý jarnalaryn» tóleý qajettigin alǵa tartyp, azamattardan qosymsha aqsha talap etýdi jalǵastyrady, — delingen habarlamada.
Barlyq anyqtalǵan fakti boıynsha ІІM sotqa deıingi tergep-tekserýdi júrgizip, qylmysqa qatysy bar adamdardy anyqtaý jáne ustaý, sondaı-aq alaıaqtyq ınternet-resýrstar men aqsha qarajatyn shyǵarýǵa arnalǵan arnalardy buǵattaý jóninde sharalar qabyldap jatyr.
Osyǵan baılanysty kıberqylmysqa qarsy is-qımyl departamenti azamattardy qyraǵy bolýǵa jáne mynadaı qaýipsizdik sharalaryn saqtaýǵa shaqyrady:
- «kepildendirilgen» tabys týraly usynystarǵa senbeý;
- beıtanys adamdarǵa jáne kúmándi shottarǵa aqsha aýdarmaý;
- kúmándi siltemelerge ótpeý jáne tekserilmegen kózderden qoldanbalardy ornatpaý;
- kompanııalar týraly aqparatty tek resmı derekkózder men memlekettik tizilimder arqyly tekserý;
- ınvestıtsııa salýdy josparlaǵan jaǵdaıda ınvestıtsııalyq naryqty zerdelep, tekserilgen kompanııalardyń resmı keńselerine ǵana júginý.
— Internet-alaıaqtyqtyń qurbany bolsańyz nemese osyndaı faktiler týraly aqparatqa ıe bolsańyz, turǵylyqty jerińiz boıynsha ishki ister organdaryna nemese «102» arnasyna dereý habarlasýyńyzdy suraımyz, — dep eskertti polıtsııa ókilderi.
Eske salaıyq, buǵan deıin Qaraǵandy oblysynda 3 jyl boıy jasyrynǵan alaıaq bet-álpetti taný júıesi arqyly ustalǵanyn jazǵanbyz.
