Alaıaqtar zeınetaqy qorynyń qyzmetkeri bolyp habarlasýǵa kóshken

NUR-SULTAN. QazAqparat – Ózin «Biryńǵaı jınaqtaýshy zeınetaqy qory» AQ qyzmetkerimin dep tanystyryp, salymshynyń zeınetaqy shotyn ashý úshin qandaıda bir banktik shotty toltyrýdy suraıtyndar qońyraý shala bastady. Bul týraly Qordyń baspasóz qyzmeti málim etti, dep habarlaıdy QazAqparat.

«Qońyraý shalýshylardyń aıtýynsha, zeınetaqy shoty sot isin júrgizýge ótemaqy tóleý boıynsha sheteldik bankterden tólemder qabyldaý úshin qoldanylady eken. Eger siz aqsha aýdarýdan bas tartsańyz, zeınetaqy shoty buǵattalyp qalady-mys», - delingen habarlamada.

Qordyń baspasóz qyzmeti mundaı qońyraýlar BJZQ qyzmetkerlerinen túspeıtinin eskertedi jáne mundaı jaǵdaıda áńgimeni toqtatýdy suraıdy.

«Sondaı-aq, myna zań tarmaqtaryn esterińizge salamyz: «Qazaqstan Respýblıkasynda zeınetaqymen qamsyzdandyrý týraly» Zańnyń 50-baby 3-tarmaǵyna sáıkes, salymshynyń (alýshynyń) boryshtary boıynsha zeınetaqy jınaqtaryna tyıym salýǵa nemese óndirip alýǵa jol berilmeıdi. «Atqarýshylyq is júrgizý jáne sot oryndaýshylarynyń mártebesi týraly» Zańnyń 98-baby 14-tarmaǵyna sáıkes, salymshynyń (alýshynyń) boryshtary boıynsha zeınetaqy jınaqtarynan óndirip alýǵa bolmaıdy. Demek, sot oryndaýshysynyń nemese kez kelgen úshinshi tulǵanyń sizdiń jeke zeınetaqy shotyńyzdaǵy zeınetaqy jınaqtarynan óndirip alýy múmkin emes. Sizdiń jeke zeınetaqy shotyńyz eshqandaı jaǵdaıda buǵattalmaıdy!» - dep kórsetilgen Qor málimdemesinde.