Alaıaqtar Ulybrıtanııada 500 myń adamnyń derekterin Alibaba arqyly satpaq bolǵan
ASTANA. KAZINFORM – UK Biobank jobasyna qatysqan shamamen 500 myń brıtandyqtyń urlanǵan medıtsınalyq derekteri Alibaba saýda alańdarynda satylymǵa qoıylǵany anyqtaldy, dep habarlaıdy Euronews.
Bul týraly Ulybrıtanııanyń tehnologııa máseleleri jónindegi mınıstri Ien Mıýrreı málimdedi.
Onyń aıtýynsha, uıym úkimetke birneshe satýshy ornalastyrǵan habarlandyrýlar týraly habar bergen. Áńgime keminde úsh derekter jıyntyǵy týraly bolyp otyr. Sonyń biri barlyq 500 myń eriktiniń málimetterin qamtýy múmkin degen boljam bar.
UK Biobank ókilderi málimetterdiń taralýyna qatysýshylardyń aty-jóni, mekenjaıy, telefon nómirleri nemese baılanys derekteri kirmegenin naqtylady. Alaıda jarııalanǵan aqparat densaýlyq jaǵdaıyna jáne ǵylymı zertteýlerde qoldanylatyn ózge de bıomedıtsınalyq kórsetkishterge qatysty bolǵan.
Ulybrıtanııa bıligi saýda alańynyń operatorymen jáne Qytaı úkimetimen baılanysqa shyqqan. Brıtan tarapynyń málimetinshe, habarlandyrýlar jedel túrde óshirilgen jáne derekterdiń satyp alynǵanyn dáleldeıtin naqty aıǵaq ázirge joq.
Joba jetekshisi Rorı Kollınz bolǵan jaǵdaı úshin qatysýshylardan keshirim surap, derekterdi qorǵaý júıesi kúsheıtiletinin aıtty. Saqtyq sharasy retinde zertteý platformasyna qoljetimdilik ýaqytsha shekteldi. Sonymen qatar faıldardy júkteýge qosymsha shekteýler engizildi.
UK Biobank álemdegi eń iri bıomedıtsınalyq aqparat bazalarynyń biri sanalady jáne ony álem ǵalymdary densaýlyq pen ómir saltyna qatysty zertteýler júrgizý úshin paıdalanady.
Buǵan deıin Qazaqstan Densaýlyq saqtaý mınıstrligi bıomedıtsınalyq jáne klınıkaǵa deıingi zertteýlerdi, sondaı-aq bıobankterdiń qyzmetin retteıtin normatıvtik qujattarǵa birqatar mańyzdy ózgerister engizgeni habarlanǵan edi.
Sondaı-aq Qazaqstanda kıbershabýyldar kezinde ınternet óshirilýi múmkin.
