Alaıaqtar sot ákimshiligi basshysynyń atyn jamylyp júr
ASTANA. KAZINFORM – Alaıaqtar Astana qalasy Sot ákimshiligi departamenti basshylyǵynyń fotosýretterin paıdalanyp júr. Bul týraly departament basshysy Eldos Jumaqsanov Astana qalasynyń Kommýnıkatsııalar qyzmetinde ótken baspasóz máslıhatynda málimdedi.
Onyń aıtýynsha, vedomstvoda qyzmetkerler arasynda alaıaqtyq shemalarǵa qatysty turaqty túrde túsindirý jumystary júrgiziledi. Alaıda soǵan qaramastan, mundaı derekter áli de kezdesip otyr.
- Ókinishke qaraı, WhatsApp, ózge de messendjerler men áleýmettik jelilerdi paıdalanyp, bizdiń fotosýretterimizdi alyp, qyzmetkerlerge taratyp, atymyzdan aqsha suraý faktileri bar. Keı jaǵdaıda ózderin quqyq qorǵaý organdarynyń qyzmetkeri retinde tanystyrady. Mundaı jaıttar boıynsha biz árdaıym qyzmetkerlerge eskertip, aldanbaýdy túsindiremiz, – dedi Eldos Jumaqsanov.
Sondaı-aq ol Sot ákimshiliginde qyzmetkerlerdiń qumar oıyndarǵa qatysý-qatyspaýyna qatysty turaqty tekserýler júrgiziletinin atap ótti. Qazaqstan zańnamasyna sáıkes, memlekettik qyzmetshilerge qumar oıyndarǵa qatysýǵa tyıym salynǵan. Mundaı derekter anyqtalǵan jaǵdaıda kináli tulǵalar qatań tártiptik jazaǵa, tipti jumystan bosatýǵa deıin tartylatynyn aıtty.
Eldos Jumaqsanovtyń habarlaýynsha, ótken jyldyń 1 shildesinen bastap departamentke jumysqa qabyldaý talaptary kúsheıtilgen. Kandıdattardy irikteý kezinde yqpal etý faktorlaryn boldyrmaý maqsatynda úmitkerler tórt kezeńnen turatyn irikteý rásiminen ótedi. Onyń alǵashqy úsh kezeńi Sot ákimshiliginen tys júrgiziledi jáne Memlekettik qyzmet isteri agenttigi arqyly shıfrlanǵan formatta ótedi. Tek tórtinshi kezeńde ǵana úmitkerlermen áńgimelesý júrgiziledi.
Buǵan deıin Ulttyq kompanııa atyn jamylǵan alaıaqtar kóbeıgenin jazǵanbyz.