Alaıaqtar shyǵysqazaqstandyqtardyń bank kartochkasynan 1,5 mln teńgeden astam qarajatty urlap ketken
ÓSKEMEN. QazAqparat - Sońǵy ýaqyttarda ShQO-da oblys turǵyndarynyń ishinde satyp alýshymen telefonmen sóıleskennen keıin kartadaǵy aqshasynyń azaıyp qalǵanynan jer sıpap qalǵandar sany kóbeıip ketti, dep habarlady «QazAqparat» HAA tilshisi.
Іshki ister departamentinen málim etkendeı, oblystyń 56 turǵyny osyndaı kıber-qylmyskerlerdiń qarmaǵyna túsip qalǵan. Olardyń 12-si kartadaǵy aqshasynyń kemigenin baıqaǵan. Qylmyskerler shottan 5000 teńgeden 1 mln 300 000 teńgege deıin somany sheship alǵan. Qazir barlyq fakti boıynsha QR QK 190-baby 1-bóligi boıynsha sot aldy tergeý júrip jatyr.
«Alaıaqtar ózderiniń qurbandaryn Internetten tabady. Oblys ortalyǵynyń turǵyny ekendikterin aıtyp, Jelige (Olx, Kolesa.kz, Market.kz jáne t.b.) jyljymaıtyn nemese jyljymaly múlikti satý nemese jalǵa berý týraly habarlandyrý bergen páter, kólik ıelerine qońyraý shalady. Olarmen sóıleskende, páter nemese kólik qatty unap qalǵanyn, eshqandaı talaby joq ekenin, baǵasyna da saýdalaspaı, tolyq kelisetinin aıtady. Ári múliktiń unaǵandyǵyna sendiredi», - dedi polıtsııadan.
«Áńgime barysynda tańdaǵan páterin nemese kóligin qazir kóre almaıtynyn, sebebi issaparda júrgenin, taıaýda qalaǵa kelip mámileni resimdeıtinin aıtady. Sonymen qatar páter nemese kólikti satyp jiberetinine alańdaýshylyq bildiredi.
Tolyq sený úshin kepil nemese aldyn ala jarna retinde aqsha bóligin aýdarý úshin olardyń banktik kartasyn nemese nómirin jiberýdi suraıdy. Tólem kartasynyń nómirin nemese birjolǵy paroldi alǵan soń, ekinshi deńgeıli banktiń ınternet-bankıngi arqyly shotqa qoljetimdilik alady. Sengish azamattarymyz «jyldam» ári «tıimdi» mámilege úmittenip, suraǵan derekterdi salyp jiberedi. Artynsha shotyn toltyrǵannyń ornyna kerisinshe, kartadaǵy aqshasynyń azaıyp qalǵanyn baıqaıdy», - dep túsindirdi ShQO ІІD.
