Alaıaqtar saıtqa tirkelgenderden avtomatty túrde kúnine 50 teńge alyp otyrǵan

ASTANA. QazAqparat - Ulttyq qaýipsizdik komıtetiniń «Memlekettik tehnıkalyq qyzmet» RMK KZ-CERT Kompıýterlik qaterlerge áreket etý qyzmeti alaıaqtyq sıpattaǵy mulhervaidosa ınternet-resýrsynyń anyqtalǵanyn jarııa etti, dep habarlaıdy QazAqparat.

«Atalmysh jaǵdaıdy taldaý jumystary kórsetip otyrǵandaı, https://mulhervaidosa.info/posobie/ paraqshasynyń kelesideı mátindik habarlamasy bar: «1991 jyldan 2018 jyldar aralyǵynda eńbek etken «ÁSMQ» AQ» qyzmetkerleri «Áleýmettik saqtandyrý memlekettik qorynan» 560 myń teńge alýǵa quqyǵy bar. Osy járdemaqyǵa quqyǵy bar adamdardyń tiziminde sizdiń atyńyzdy bar-joǵyn tekserip alyńyz» Osyndaı aqparat taratylǵan», - delingen habarlamada.

Vedomstvodan habarlanǵandaı, alaıaqtar mobıldi messendjerler men elektrondy poshtalar arqyly WhatsApp messendjerimen bólisý jolymen aqyǵa ıe bolý úshin mulhervaidosa.info/posobie/# ınternet-resýrsynda saýalnamadan ótýge shaqyrǵan.

Osy habarlama taratylǵannan keıin qatysýshyny ártúrli ınternet-resýrstarǵa baǵyttap otyrǵan. Qoldanýshyǵa tek vıdeorlıkti kórý usynylady. Al ol rolıkke qoldanýshy «ofertanyń sharttarymen kelisken» jaǵdaıda ǵana kiretin bolǵan. Vıdeorolık qosylyp ketkennen keıin qoldanýshy «Vıdeoprıkoly» qyzmetine avtomatty túrde tirkelip ketedi de, ol ofertanyń tómengi jaǵynda jazylǵanyndaı kúnine 50 teńge tarıf tóleýge mindetti bolyp qalǵan. Qyzmetti alyp tastaý úshin mindetti túrde «stop» batyrmasyn basý kerek.

Osyǵan baılanysty KZ-CERT belgisiz poshtalardan keletin kúdikti hattardy suryptaýǵa shaqyrady. Vedomstvodn eskertilgendeı, alaıaqtyq jaǵdaıy anyqtalǵan kúnde 1400 nómirine habarlasýǵa bolady.