Alaıaqtar pavlodarlyq zeınetkerdiń 36 mln teńgesin úptep ketti

PAVLODAR. KAZINFORM - 67 jastaǵy ájeı alaıaqtardyń arbaýymen úıin satyp, depozıttegi aqshasyn sheship, tipti óz atyna nesıe resimdegen. Barlyq qarajatty túgin qaldyrmaı kórsetilgen shotqa aýdaryp jibergen.

Pavlodar qalasynda turatyn zeınetker alaıaqtardyń kezekti qurbanyna aınaldy. Polıtsııanyń málimetinshe, 2025 jyldyń shilde aıynda 67 jastaǵy qarııanyń telefonyna «Sizge alaıaqtyq áreketter jasalýda» degen habarlama kelip túsedi. 

- Keıin oǵan áldebir qyz telefon shalady. Ájeıge úıin tez arada satyp, banktegi aqshasyn sheshý, ony qaýipsiz esepshotqa aýdarý qajettigin habarlaıdy. Olaı jasamasa, alaıaqtardyń qurbany bolasyz dep qorqytqan. Qyzdyń aıtqanyna senip qalǵan zeınetker aıtqanynyń barlyǵyn jasaıdy. Odan soń qaskúnemder oǵan taǵy habarlasyp, atyna bireýler nesıe alǵaly jatqanyn, ony joıý úshin ózge nesıeni resimdeý kerek ekenin aıtqan. Osylaısha alaıaqtar zeınetkerge bir demde úıin satqyzyp, depozıttegi aqshasyn sheshkizip, eń sońy nesıe alǵyzǵan. Jalpy somasy 36 mln teńgeden astam somany ózge shotqa aýdartqyzǵan, - dep habarlady óńirlik polıtsııa departamenti bastyǵynyń birinshi orynbasary Bolat Nurseıitov.

Qazirgi ýaqytta atalǵan oqıǵa boıynsha qylmystyq is qozǵalǵan. Tártip saqshylary qylmysqa qatysy bar tulǵalardy anyqtaýǵa baǵyttalǵan is-sharalar júrgizip jatyr.

Eske sala keteıik, Bas prokýratýra alaıaqtyqtyń jańa shemasy týraly eskertti.