Alaıaqtar nekeni de «uzartýǵa» kóshti: Ádilet mınıstrligi eskertý jasady
ASTANA. KAZINFORM — «Nekeni uzartý» týraly habarlama kelse, siltemege ótpeńiz. Ádilet mınıstrligi qazaqstandyqtardy eskertti.
— Áleýmettik jelilerde ekinshi deńgeıli bankterdiń qosymshasy arqyly taralyp jatqan «nekeni tirkeý merzimin uzartý qajettigi» týraly aqparat shyndyqqa sáıkes kelmeıdi jáne alaıaqtyq sıpatqa ıe, — dedi Ádilet mınıstrliginiń resmı ókili Talǵat Ýálı.
QR Ádilet mınıstrligi neke-otbasy zańnamasyna sáıkes, neke bir ret tirkeledi jáne onyń shekti merzimi belgilenbeıdi. Osyǵan baılanysty Ádilet mınıstrligi nekeni uzartý talap etilmeıtindigin eskertedi.
— Neke erli-zaıyptylardyń bireýiniń nemese ekeýiniń ótinishi boıynsha nekeni buzý arqyly, sondaı-aq zańnamada kózdelgen ózge de jaǵdaılarda toqtatylýy múmkin. Nekeni buzý tek tirkeýshi organ arqyly nemese sot sheshiminiń tártibimen júzege asyrylady. Nekeni buzý tirkeýshi organ arqyly memlekettik tirkelgen kúninen bastap, al sot tártibimen buzylǵan jaǵdaıda — sot sheshimi zańdy kúshine engen kúnnen bastap toqtatylady. Osyǵan baılanysty azamattardyń nazaryn osyndaı habarlamalardyń shyndyqqa sáıkes kelmeıtinine aýdaryp, olardy kórsetilgen siltemelerge ótpeýge jáne derbes derekterdi bógde adamdarǵa usynbaýǵa shaqyramyz. Durys ári naqty aqparat alý úshin resmı derekkózderge júginýdi suraımyz, — dedi Talǵat Ýálı.
Osyǵan deıin jalǵan aqparatqa qarsy ortalyq jarty jylda 68 feıkti joqqa shyǵarǵanyn jazǵan edik.
