Alaıaqtar Memlekettik kirister komıtetiniń ókili bolyp habarlasyp júr

ASTANA. KAZINFORM — Qazaqstanda ózin Memlekettik kirister organdarynyń qyzmetkerleri retinde tanystyryp, azamattarǵa qońyraý shalatyn alaıaqtar áreketi jıilep ketti. Osy máselege baılanysty QR Qarjy mınıstrliginiń Memlekettik kirister komıteti pikir bildirdi.

Qaskóıler qazaqstandyqtarǵa 250 nemese 270 nysandar boıynsha deklaratsııanyń merzimi ótip ketkenin nemese derekterde qate bar ekenin aıtyp, olardyń jeke derekterin alýǵa tyrysady.

— Memlekettik kirister organdarynyń qyzmetkerleri azamattarǵa qońyraý shalmaıdy. Tıisinshe eshqandaı kod, qupııasóz nemese jeke derekter talap etilmeıdi. Bul 250, 270 jáne ózge formalarǵa da qatysty, — dedi Memlekettik kirister komıtetiniń resmı ókili Gúljan Qalmenova elordada ótken brıfıngte.

Komıtet azamattarǵa barlyq habarlamalar men salyqtyq mindettemeler týraly aqparatty tek resmı memlekettik servıster arqyly ǵana bilýge bolatynyn eske saldy.

Buǵan deıin Qarjy naryǵyn retteý jáne damytý agenttigi qarjy pıramıdasyn qalaı tanýǵa jáne alaıaqtardan qalaı qorǵanýǵa bolatynyn túsindirgen edi.