Alaıaqtar kúshtik qurylym basshylarynyń atyn paıdalanyp júr
ASTANA. KAZINFORM — Іshki ister mınıstrliginde azamattarǵa alaıaqtyqtyń jańa shemasy týraly eskertý jasaldy, dep habarlaıdy Polisia.kz.
Sońǵy ýaqytta kúshtik qurylymdar men quqyq qorǵaý organdary basshylarynyń aty-jóni men fotosýretterin paıdalaný arqyly jasalatyn alaıaqtyq jaǵdaılary kezdesip jatyr.
Qaskóıler messendjerler men áleýmettik jelilerde jalǵan akkaýnttar ashyp, ózderin laýazymdy tulǵa, burynǵy áriptes nemese tanys adam retinde kórsetedi.
— Ártúrli syltaýmen shuǵyl túrde qaryzǵa aqsha berýdi suraıdy. Saq bolyńyzdar! Aqsha aýdarýdy suraǵan habarlamalarǵa, tipti olar ózińiz tanıtyn adamnyń atynan kelse de, senbeńizder. Eshkimge SMS-kodtardy, bank kartasynyń derekterin, qupııasózderdi jáne basqa da jeke málimetterdi bermeńizder. Kúmándi siltemelerge ótpeńizder jáne belgisiz qosymshalardy ornatpańyzdar. Osyndaı habarlamalar alǵan jaǵdaıda, aqparattyń ras-ótirigin mindetti túrde ózińiz biletin telefon nómiri nemese resmı baılanys arnalary arqyly tekserińizder, — dedi ІІM.
Budan buryn Astana polıtsııasy 19 mln teńgeni alaıaqtardyń ıemdenýine jol bermegenin jazǵanbyz.
