Alaıaqtar QR Premer-Mınıstriniń atynan jalǵan málimdeme taratýda

Áleýmettik jelilerde QR Premer-Mınıstri Álıhan Smaıylov ınternet-alaıaqtardyń áreketinen zardap shekkenderge ótemaqy tólenetini týraly aıtqan vıdeo tarap jatyr. stopfake.kz málimetinshe – bul feık, dep habarlaıdy Kazinform.

«Vıdeoda Qazaqstanda «urlanǵan qarajatty qaıtarý jáne óteý jónindegi» komıtet qurylǵany aıtylady. Bul – jalǵan. Elimizde mundaı komıtet joq jáne bolǵan emes. Alaıaqtar atalǵan jarnamany aldanǵan adamdarǵa kómektesemiz dep taratyp jatyr. Alaıda keıin aqshany «qaıtarý» qyzmetteri týraly jazylǵan saıtqa ótýdi usynady. Nátıjesinde, alaqol ınvestorlar ıemdengen aqshany qaıtarý úshin taǵy da aqsha tóleý kerek bolady.
Osylaısha alaıaqtarǵa bir kezderi aldanǵan adamdar taǵy da quryqqa túsedi», - delingen málimette.

Mundaı habarlandyrýlar Qazaqstanda jáne Reseıde buǵan deıin de taraǵany anyqtaldy. Ol kezde qarjy pıramıdalarynan zardap shekken azamattarǵa ótemaqy tóleý týraly aıtylǵan.

«Esterińizge sala keteıik, aqshadan aıyrylyp, kıberqylmyskerlerdiń quryǵyna túspeý úshin kúmándi siltemeler boıynsha ótpeńiz jáne úshinshi tarap resýrstarynda jeke jáne banktik derekterdi jazyp, qaldyrmańyz. Tek resmı jáne senimdi aqparat kózderine sený qajet», - dep túıindeıdi stopfake.kz.