Alaıaqtar qońyraý shalatyn jalǵan telefon nómirleri buǵattalady - mınıstr

NUR-SULTAN. QazAqparat – Elimizde ınternet pen telefon arqyly alaıaqtyq jasaý faktileri kóbeıip ketti. 2016 jyly 1 myń derek tirkelgen bolsa, 2021 jyly 21 myńǵa jetken. Bul týraly tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın áleýmettik jelidegi paraqshasynda jazdy, dep habarlaıdy QazAqparat.

Vedomstvo basshysy ishki ister mınıstri Marat Ahmetjanovpen birlese ótken keńeste ınternettegi alaıaqtyqqa qarsy is-qımyl máseleleri talqylanǵanyn málim etti.

«Qazirgi ýaqytta baılanys operatorlarymen birge osy máselege qatysty birlesken is-sharalardy júzege asyryp jatyrmyz. Alaıaqtarmen kúresýdiń tıimdi ádisteriniń biri – jalǵan nómirlerdi buǵattaý. Qyrkúıek aıynyń sońyna deıin baılanys operatorlary alaıaqtar qońyraý shalatyn jalǵan telefon nómirlerin anyqtap, buǵattaıtyn bolady.

Tsıfrlyq damý mınıstrligi azamattardyń qaýipsizdigin eskere otyryp, uıaly nómirlerdi tirkeý kezinde bıometrııalyq sáıkestendirý júıesin engizýdi qarastyryp jatyr. Osylaısha, biz telefon nómirleriniń bóten adamdarǵa tirkelý jaǵdaılarynyń aldyn alǵymyz keledi», - dep jazady Baǵdat Mýsın.

Sondaı-aq, mınıstrlik ınternettegi alaıaqtyqqa qarsy aqparattyq-túsindirý baǵytynda banktermen tyǵyz áreket jasaýdy usynady.

«Óıtkeni, alaıaqtyq faktiler kóp jaǵdaıda bank operatsııalarymen tikeleı baılanysty. Bank qyzmetkerleri turǵyndarǵa habarlasqan ýaqytta, onyń shynymen de bankten habarlasyp turǵanyna kóz jetkizý úshin SMS-habarlamalar arqyly sáıkestendirý júıesin engizýge bolady», - deıdi mınıstr.

Kezdesý barysynda Qoǵamdyq keńes músheleri alaıaqtarǵa jáne olardyń aıla-amaldaryna qatysty barlyq málimetter engiziletin arnaıy platforma qurýdy usynǵan.

«Biz usynǵan bastamalar problemany túbegeıli joımaıtynyn atap ótkim keledi, bul – máseleni sheshýdiń bir ǵana bóligi. Sondyqtan, tehnologııalyq turǵydan basqa, arnaıy jobalar arqyly halyqtyń qarjylyq jáne zańdyq saýattylyǵyn arttyrý baǵytynda jumystardy kúsheıtýimiz qajet», - dep túıindeıdi Baǵdat Mýsın.