Alaıaqtar qoldy qylǵan qarajatty zań boıynsha qalaı qaıtarýǵa bolady
ASTANA. KAZINFORM – Astana qalasynyń kommýnıkatsııalar qyzmeti alańynda ótken baspasóz máslıhatynda Nura aýdany prokýratýrasy bóliminiń bastyǵy Shahrıramadan Sultan ınternet-alaıaqtyqtan zardap shekken azamattardyń quqyqtaryn qorǵaý jáne keltirilgen shyǵyndy óteý máseleleri týraly aıtty.
Onyń aıtýynsha, prokýratýra alaıaqtyqtan zardap shekken azamattarǵa keltirilgen materıaldyq zalaldy óndirý máselesine erekshe kóńil bóledi. Qazaqstan Respýblıkasy Azamattyq kodeksiniń 953-babyna sáıkes, zańdy negizsiz aqsha nemese múlik alǵan adam ony ıesine qaıtarýǵa mindetti. Bul talap alaıaqtarǵa urlanǵan qarajatty qabyldaý jáne qolma-qol aqshaǵa aınaldyrý úshin óz bank kartalaryn paıdalanýǵa bergen dropperlerge de qatysty.
– Eger adam zańdy negizsiz aqsha qarajatyn nemese múlikti ıelense, ıaǵnı bul múlik oǵan syıǵa berilmese, satylmasa, ony ózi satyp almasa nemese ony adal eńbegimen tappasa, ol sol qarajatty nemese múlikti zańdy ıesine qaıtarýǵa mindetti. Bul talap dropperlerge, ıaǵnı urlanǵan aqshany qabyldaý jáne qolma-qol aqshaǵa aınaldyrý úshin ózderiniń bank kartalaryn alaıaqtarǵa paıdalanýǵa beretin adamdarǵa tikeleı qatysty. Mundaı adamdy alaıaqtyqqa sybaılas retinde qylmystyq jaýapkershilikke tartý múmkin bolmasa da, jábirlenýshiniń azamattyq sot isin júrgizý tártibimen onyń banktik shoty arqyly ótken qarajat kóleminde keltirilgen materıaldyq zalaldy óndirip alýǵa quqyǵy bar, – dedi Shahrıramadan Sultan.
Spıkerdiń málimetinshe, tájirıbede ınternet-resýrstardy, áleýmettik jeliler men onlaın-platformalardy paıdalaný arqyly jasalatyn alaıaqtyqtyń túrli tásilderi kezdesedi. Sonyń biri Mekke men Mádınaǵa qajylyq saparyn uıymdastyrýdy syltaý etken alaıaqtyq.
Onyń aıtýynsha, kúdikti azamattardan sapardy rásimdeýge, áýe bıletterin satyp alýǵa jáne qonaqúıge ornalastyrýǵa ýáde berip aqsha jınaǵan. Alaıda qarajatty alǵannan keıin ýádesin oryndamaǵan. Sot úkimimen oǵan 4 jyl 6 aı merzimge bas bostandyǵynan aıyrý jazasy taǵaıyndaldy.
Prokýratýra ókili azamattardy bank kartasynyń derekterin, SMS arqyly keletin rastaý kodtaryn bógde adamdarǵa bermeýge jáne ońaı ári tez tabys tabý týraly usynystarǵa syn kózben qaraýǵa shaqyrdy.
– Qazaqstan Respýblıkasynyń zańnamasynda, onyń ishinde aqparattyq tehnologııalardy paıdalaný arqyly jasalǵan alaıaqtyq úshin qatań qylmystyq jaýapkershilik kózdelgen. Qylmystyq kodekstiń 190-babyna sáıkes, aýyrlatatyn mán-jaılar bolǵan jaǵdaıda kináli adam 10 jylǵa deıin bas bostandyǵynan aıyrylyp, múlki tárkilenýi múmkin. Sondaı-aq belgili bir laýazymdardy atqarý nemese belgili bir qyzmetpen aınalysý quqyǵynan 10 jylǵa deıin, al jekelegen jaǵdaılarda ómir boıyna aıyrylýy yqtımal, – dep tolyqtyrdy Shahrıramadan Sultan.
Aıta keteıik, Qazaqstanda ınternet-alaıaqtyqtan kelgen shyǵyn 4,8 mlrd teńgege jetti.
