Alaıaqtar kóbeıdi: QazAvtoJol merdigerlerge eskertý jasady
ASTANA. KAZINFORM – «QazAvtoJol» UK» AQ merdiger, qosalqy merdiger uıymdar men áleýetti ónim berýshilerdi jol jobalary men jumys kólemderin alýǵa aqshalaı syıaqy úshin «kómektesemiz» dep ýáde beretin úshinshi tulǵalardyń alaıaqtyq áreketterinen saq bolýǵa shaqyrdy.
Qolda bar aqparatqa sáıkes, belgisiz tulǵalar merdiger kompanııalardyń ókilderimen baılanysyp, ózderin deldal retinde tanystyrady. Olar ulttyq kompanııada «baılanystary baryn» aıtyp, jumystardy bólýge nemese satyp alý rásimderiniń nátıjelerine yqpal ete alatynyn alǵa tartady. Jeke kezdesýler kezinde aldyn ala tólem talap etip, bul áreketteri «QazAvtoJol» UK» AQ basshylyǵymen kelisilgen dep sendirýge tyrysady.
Telefon qońyraýlary men deldaldar arqyly baılanys ornatý áreketterinen bólek, bógde tulǵalardyń osyndaı usynystarmen «QazAvtoJol» UK» AQ-nyń ortalyq keńsesine tikeleı kelgen deregi de tirkeldi. Olar jol jobalaryna qatysty «máselelerdi sheship berýdi» usynǵan. Atalǵan jaǵdaıdy Kompanııanyń qaýipsizdik qyzmeti anyqtap, tıisti materıaldar quqyq qorǵaý organdaryna joldandy. Osyndaı áreketterdiń aldyn alý maqsatynda atalǵan tulǵalar qatysqan beınematerıal da qosymsha jarııalanatyn bolady.
Kompanııa resmı túrde málimdedi: bul tulǵalardyń «QazAvtoJol» UK» AQ qyzmetine eshqandaı qatysy joq. Kompanııa basshylyǵy men qyzmetkerleri úshinshi tulǵalarǵa kelissóz júrgizýge, jol jobalaryn alyp berýge ýáde etýge, ónim berýshilerdiń múddesin ilgeriletýge nemese tender nátıjelerine yqpal etýge eshqandaı ókilettik bergen joq.
Barlyq satyp alý rásimderi Qazaqstan Respýblıkasynyń zańnamasyna sáıkes júzege asyrylady. Konkýrstar, olarǵa qatysý talaptary, ótinim berý merzimderi jáne satyp alý qorytyndylary týraly aqparat Qazaqstan Respýblıkasynyń memlekettik satyp alý veb-portalynda ornalastyrylady.
«QazAvtoJol» UK» AQ mundaı áreketterde alaıaqtyq, zańsyz deldaldyq jáne naryq qatysýshylaryn sybaılas jemqorlyq shemalaryna tartý sekildi qylmystyq quqyq buzýshylyq belgileri bolýy múmkin ekenin eskertti.
Kompanııanyń Sybaılas jemqorlyqqa qarsy komplaens-qyzmeti sybaılas jemqorlyq táýekelderiniń aldyn alý, alaıaqtyq shemalardy anyqtaý jáne satyp alý rásimderin zańsyz aralasýdan qorǵaý baǵytynda turaqty jumys júrgizip keledi.
– Eger sizge jol jobalaryn nemese jumys kólemderin aqshalaı syıaqy úshin alyp berý, «kómektesý», «máseleni sheshý», múddeni ilgeriletý nemese tender nátıjesine yqpal etý týraly usynys tússe, bul týraly «QazAvtoJol» UK» AQ komplaens-qyzmetine dereý habarlaýdy suraımyz: Jedel jeli: +7 (7172) 64-87-35. Baılanys ortalyǵy: 1403, - delingen habarlamada.
