Alaıaqtar QMA atynan jalǵan hat taratyp, azamattardyń derekterin alýǵa tyrysqan
ASTANA. KAZINFORM — Qazaqstanda alaıaqtar Qarjylyq monıtorıng agenttiginiń atynan jalǵan resmı hattar taratýdy jalǵastyryp jatyr.
Agenttikke memlekettik organdardyń birine QMA atynan jiberilgen kezekti jalǵan hat týraly aqparat túsken. Qujatta qaskóıler tekserý júrgizilip jatqanyn aıtyp, azamat týraly málimetterdi, onyń ishinde minezdemesi men basqa da aqparatty suratqan.
QMA málimetinshe, buǵan deıin de alaıaqtar osyndaı tásilge júgingen. Aldymen azamattarǵa Agenttik atynan jasalǵan jalǵan hat joldap, keıin telefon nemese messendjer arqyly baılanysqan. Ózderin QMA qyzmetkeri retinde tanystyrǵan qaskóıler jeke jáne bank derekterin alýǵa nemese aqsha aýdarýdy talap etýge tyrysqan.
— Agenttik azamattardy jalǵan qujattarǵa senbeýge shaqyrdy. QMA qyzmetkerleri telefon arqyly bank shottarynyń derekterin berýdi nemese aqsha aýdarýdy talap etpeıdi. Qujatta memlekettik organnyń logotıpi, móri nemese qoltańbasy bolýy onyń shynaıy ekenin bildirmeıdi, — delingen habarlamada.
Kúmándi hat alǵan jaǵdaıda onyń shynaıylyǵyn QMA-niń resmı baılanys arnalary arqyly tekserý qajet. Beıtanys adamdarǵa jeke jáne bank derekterin bermeı, olardyń nusqaýymen aqsha aýdarmaý kerek.
Kúmán týyndasa, QMA-niń 1458 Call-ortalyǵyna nemese +7 (7172) 70-84-79 nómiri arqyly Kezekshi bólimge habarlasýǵa bolady.
Eske salaıyq, buǵan deıin Túrkistanda alaıaqtar QMA qyzmetkerleri retinde tanysyp, 15 mln teńge bopsalaǵanyn habarlaǵanbyz.
