Alaıaqtar qazir jasandy ıntellektiniń kómegimen aldaıtyn bolǵan — sarapshy

ASTANA. KAZINFORM — Elimizde ınternet-alaıaqtyq azaımaı tur. Tyǵyryqqa tirelgenderdi áńgimege tartsań, kóbiniń máselesi shaǵyn qarjy uıymdarymen baılanysty. Alaıaqtar birneshe nesıe resimdep, qolyna ustap kórmegen aqshany moınyna ilip bergen. «Qaryzsyz qoǵam» jobasynyń sarapshysy Jandos Ázimbaı agenttik tilshisine jasandy ıntellektiń qaýpi jaıly aıtyp berdi.

Naryq qyspaqqa alǵanda ekiniń biriniń esepshotynda mıllıondap qarajat jatqan joq. Mundaı jaǵdaıǵa kóbine zeınetkerler tap bolady.

Alaıaqtar ózderin bank qyzmetkeri retinde tanystyryp, «esepshotyńyzdaǵy qarajatty alaıaqtar sheship alaıyn dep jatyr» dep qara bultty tóndirip, qarttardy qapy qaldyryp jatady. Jastardyń ózi áp-sátte aldanyp, san soǵýda.

Jandos Ázimbaıdyń aıtýynsha, ótken ǵasyrdyń 90-shy jyldary qalanyń adamdar kóp shoǵyrlanǵan oryndarynda «alık-malık sharık» oıyny keń tarap, «daı pogadaıý» dep syǵandar júretin bolsa, qazir olardyń ornyn ınternet-alaıaqtar basqan.

«Jasandy ıntellektiń shyǵýy ınternet-alaıaqtyqtyń órshýine túrtki bolyp otyr. Sebebi, JI adamnyń túrin, daýysyn keltire alady. Alaıaqtar sony paıdalanyp, jaqyn aralasatyn adamdar arasynda habarlama jiberip, qarajat aýdarýdy ótinedi. „Saqtyqta qorlyq joq“ degen maqaldyń jany bar. Ár adam barynsha saýatty bolý kerek», — deıdi J. Ázimbaı.

Adamdardyń kóbi «Ózi kináli. Qalaı aldanyp qalady eken?» dep jatady. Biraq, turǵyndardyń báriniń birdeı quqyqtyq saýaty joǵary emes. Keıbireýi sengish keledi. Jaratylysy sol. 

Ádette alaıaqtardyń quryǵyna túsip jatatyn — sondaı sanattaǵy adamdar. Alaıaqtar da túrli aıla-amal qoldanyp, tipti sońǵy kezde quqyq qorǵaý organdarynyń atynan habarlasatyn bolǵan. Qalaı senip qalǵanyńdy sezbeısiń. 

«Qazir joǵary oqý oryndarynda „kıberqaýipsizdik“ páni engizilip jatyr. Bul — bolashaqtyń mamandyǵy. Polıtsııa departamentterinde arnaıy bólim bar ma, joq pa, belgisiz, buryndary UQK-da kıberqylmyspen aınalysatyn arnaıy qyzmet bolatyn. Ne desek te, jasandy ıntellekt arqyly jasalatyn kıberqylmystarǵa barynsha tosqaýyl qoıý qajet. Áıtpese, týǵan anańnyń daýysyn salýǵa qabiletti bul júıe talaı adamdy san soqtyrary anyq», — deıdi sarapshy.