Alaıaqtar qazaqstandyqtarǵa zeınetaqy jınaqtaryn qolma-qol aqshaǵa aınaldyrýdy usyna bastady — BJZQ
ASTANA. KAZINFORM — Biryńǵaı jınaqtaýshy zeınetaqy qory (BJZQ) qazaqstandyqtardy zeınetaqy jınaqtaryna qatysty alaıaqtyq shemalardan saq bolýǵa shaqyrdy. Qor barlyq qyzmettiń tegin kórsetiletinin eske salyp, azamattarǵa jalǵan usynystarǵa senbeýdi eskertti. Bul týraly BJZQ habarlady.
Alaıaqtar qandaı shemalardy qoldanady?
BJZQ málimetinshe, alaıaqtar salymshylarǵa telefon shalady nemese messendjerler arqyly habarlama jiberip, ózderin qor qyzmetkerleri retinde tanystyrady. Olar zeınetaqy jarnalary túspegenin, zeınetaqy qaıta esepteletinin nemese azamattarǵa qosymsha tólemder tıesili ekenin aıtyp, jalǵan aqparat taratady.
Tólemderdi rásimdeý nemese BJZQ bólimshelerindegi elektrondyq kezekke jazý syltaýymen alaıaqtar azamattardan jeke derekterin jáne SMS arqyly kelgen rastaý kodtaryn suraıdy.
Taǵy bir keń taralǵan tásil — zeınetaqy shottarynyń buǵattalǵany týraly jalǵan habarlama taratý. Mundaı jaǵdaıda alaıaqtar kásiporyn qyzmetkerlerine nemese býhgalterlerge habarlasyp, keıin olardy jalǵan sot oryndaýshylaryna baǵyttaýy múmkin. Sońǵylary joq shekteýlerdi alyp tastaý úshin aıyppul tóleýdi talap etedi.
Sonymen qatar alaıaqtar zeınetaqy jınaqtaryn turǵyn úı satyp alýǵa nemese emdelýge paıdalaný, sondaı-aq ınvestıtsııalyq portfeldi basqarýshylarǵa aýdarý degen jeleýmen qolma-qol aqshaǵa aınaldyryp berýdi usynady. Mundaı deldaldar óz qyzmeti úshin aldyn ala tólem talap etedi nemese azamattardyń bank derektemelerin suraıdy.
Qor ókilderi alaıaqtardyń jasandy ıntellektini de paıdalana bastaǵanyn eskertti. Atap aıtqanda, olar jalǵan saıttar jasap, adamdardyń daýysyn qoldan jasap, jalǵan aýdıo jáne beınematerıaldar taratýy múmkin.
Zeınetaqy jınaqtaryn alaıaqtardan qalaı qorǵaýǵa bolady?
BJZQ qyzmetkerleri azamattardan telefon arqyly jeke derekterin suramaıtynyn, SMS-kodtar men qupııasózderdi aıtýdy nemese aqsha aýdarýdy talap etpeıtinin erekshe atap ótti.
Qor qazaqstandyqtarǵa kelip túsken aqparatty resmı saıt nemese baılanys ortalyǵy arqyly tekserýge keńes beredi. Alaıaqtyq belgileri baıqalǵan jaǵdaıda áńgimeni dereý toqtatyp, polıtsııaǵa júginý qajet.
BJZQ zeınetaqy tólemderi eshqandaı deldalsyz jáne komıssııasyz rásimdeletinin eske saldy. Jınaqtardy tek zańnamada kózdelgen jaǵdaılarda ǵana paıdalanýǵa bolady.
Zeınetaqy jınaqtaryn ınvestıtsııalyq portfeldi basqarýshyǵa aýdarýdy salymshylar BJZQ saıtyndaǵy jeke kabıneti nemese mobıldi qosymshasy arqyly elektrondyq tsıfrlyq qoltańbany paıdalanyp, óz betinshe júzege asyra alady.
Al zeınetaqy jınaqtaryn turǵyn úı jaǵdaıyn jaqsartý nemese emdelý maqsatynda paıdalaný tek ýákiletti operatorlar — ekinshi deńgeıli bankter arqyly júzege asyrylady.
«Ulttyq qor — balalarǵa» baǵdarlamasy aıasyndaǵy alaıaqtyq
BJZQ «Ulttyq qor — balalarǵa» baǵdarlamasyna qatysty da alaıaqtyq áreketter kóbeıgenin eskertti. Atap aıtqanda, deldaldar belgili bir aqyǵa balalar týraly málimetterdi baǵdarlamaǵa engizýge nemese nysanaly jınaqtardy alýǵa kómektesýdi usynady.
Qor mundaı qyzmetter úshin aqy tóleýdiń qajeti joq ekenin atap ótti. Ata-analar men zańdy ókilder balalar týraly málimetterdi, sonyń ishinde JSN-di, týǵan kúnin, tegi, aty jáne ákesiniń atynyń durys jazylýyn óz betinshe teksere alady.
Eger derekterde qate anyqtalsa, olardy memlekettik derekqorlarda túzetý nemese halyqqa qyzmet kórsetý ortalyǵyna júginý qajet.
18 jasqa tolǵan qazaqstandyqtar da nysanaly jınaqtaryn paıdalaný úshin ýákiletti bankter arqyly óz betinshe ótinim bere alady. Qarajatty bilim aqysyn tóleýge nemese turǵyn úı jaǵdaıyn jaqsartýǵa baǵyttaýǵa ruqsat etilgen. Bul qyzmet te tegin kórsetiledi.
Eske salaıyq, buǵan deıin Qazaqstanda jalǵan stomatologııalyq qyzmetter arqyly zeınetaqy jınaqtaryn zańsyz shyǵarý shemasy anyqtalǵan bolatyn. Qarjylyq monıtorıng agenttiginiń málimetinshe, bul iske 42 stomatologııalyq klınıka qatysyp, olar arqyly 200 mlrd teńgeden astam qarajat shyǵarylǵan.