Alaıaqtar Qarjy monıtorıngi agenttigi atyn jamylyp aldaýǵa kóshti
ASTANA. KAZINFORM – Alaıaqtar agenttik atynan habarlasyp, ózderin «zańger» nemese «tekserýshi maman» retinde tanystyrady, «sizdiń uıymǵa qatysty tekserý bastaldy» degen mazmundaǵy jalǵan habarlamalar taratyp júr.
- Agenttik mundaı hattar jibermeıdi jáne telefon arqyly jeke derekterdi suramaıdy. Biz shot nómirlerin, SMS-kodtar men qujattarǵa qatysty qupııa aqparatty talap etpeımiz, - dep habarlady vedomstvodan.
Alaıaqtyq shema qalaı júzege asady?
Alaıaqtar QMA men UQK atynan jalǵan hattar taratyp, «qyzmetkerge minezdeme» nemese basqa aqparat berýdi suraıdy.
Sonymen qatar, WhatsApp arqyly sol uıymnyń basshysy men esepshisiniń atynan jazyp, olardyń naqty fotosýretteri men esimderin paıdalanady. Bul senim týdyryp, adastyrýǵa sebep bolady. Habarlamalar keıde memlekettik tilde jazylady.
Keıin «zańger» retinde bireý habarlasyp, «qupııa aqparat» ekenin aıtyp, bul týraly týystaryńyzǵa, balalaryńyzǵa, tipti quqyq qorǵaý organdaryna aıtýǵa tyıym salady.
Qysym kórsetý tásili qoldanylady: bir mezette qońyraýlar men habarlamalar kelip, jedeldik pen qaýip sezimin týdyrady, adam oılanyp úlgermeı áreket etýge májbúr bolady.
Jábirlenýshige bankke dereý barý jáne kórsetilgen nusqaýlardy oryndaý qajet delinedi. Saldarynan azamattar óz jınaqtaryn sheship, alaıaqtarǵa jiberip qoıady.
Mundaı qońyraýlar kóbine psıhologııalyq qysymǵa ońaı túsip, aldanýǵa beıim keletin zeınet jasyndaǵy adamdarǵa baǵyttalatynyn eskerý qajet.
Eger siz alaıaqtardyń nysanasyna aınalsańyz:
- Sabyr saqtap, áńgimeni birden úzińiz.
- Siltemelerge ótpeńiz, tirkemelerdi ashpańyz.
- Eshkimge aqsha aýdarmańyz.
- Jumys ornyńyzdaǵy býhgalterııa nemese zań bólimimen baılanysyp, rasynda osyndaı hat kelgen-kelmegenin naqtylańyz.
- Alaıaqtar sizdiń aqparatty teksermeıtinińizge senedi.
- Áriptesterińiz ben basshylyqty qyzmetkerler týraly derekterdiń taralý qaýpi jóninde eskertińiz.
- Habarlasqan nómirdi saqtap, aqparatty quqyq qorǵaý organdaryna habarlańyz.
- Bul aqparatty týystaryńyzǵa, dostaryńyzǵa jáne áriptesterińizge jetkizińiz. Tek birigip áreket etkende ǵana alaıaqtarǵa tosqaýyl qoıyp, ár azamattyń qarjylyq qaýipsizdigin qamtamasyz ete alamyz, - dep jazdy mamandar.
Aıta keteıik, depýtat Aıdos Sarym ezoterıkter men trener-koýchterdi synǵa aldy.