Alaıaqtar halyqty sotqa qatysý týraly jalǵan habarlama arqyly aldaı bastady – polıtsııa
SEMEI. KAZINFORM – Abaı oblysynyń polıtseıleri alaıaqtardyń «sotqa qatysý týraly» jalǵan habarlamalar men siltemeler taratyp jatqanyn eskertti.
Alaıaqtar azamattarǵa messendjerler, SMS nemese elektrondy poshta arqyly habarlasyp, ózderin sot nemese basqa da memlekettik organ qyzmetkerleri retinde tanystyrady.
- Habarlamada «siz sot otyrysyna qatysýyńyz kerek. Kelmegen jaǵdaıda aıyppul arqalaısyz. Eger jaǵdaıdy sotqa deıin sheshemin deseńiz berilgen nomer arqyly habarlasyńyz» degen mazmunda aqparat berilip, arnaıy siltemege ótýdi suraıdy. Atalǵan siltemeler jalǵan saıttarǵa aparady, - dep habarlady oblystyq polıtsııa departamentinen.
Bul saıttar resmı portaldarǵa uqsas etip jasalǵan. Onda paıdalanýshydan jeke derekterin, sonyń ishinde JSN, bank kartasynyń málimetteri men SMS-kodtardy engizý talap etiledi.
- Mundaı aqparatty engizý alaıaqtarǵa sizdiń qarjyńyzǵa qol jetkizýge múmkindik beredi. Sondyqtan alaıaqtardyń bul aılasyna aldanyp qalmańyz. Memlekettik organdar kúmándi siltemeler jibermeıdi. Sotqa shaqyrý resmı túrde ǵana jetkiziledi, - delingen aqparatta.
Eske salsaq, osyǵan deıin SQO-da byltyr ınternet alaıaqtar turǵyndardy 1,4 mlrd teńgege aldaǵany habarlanǵan.
