Alaıaqtar endi medıtsına mekemeleriniń atyn jamylyp áreket ete bastady
ASTANA. KAZINFORM – Densaýlyq saqtaý mınıstrligi azamattardy skrınıngtik tekserýge shaqyrýǵa qatysty alaıaqtyq áreketter týraly eskertti.
- Alaıaqtar medıtsınalyq uıymdardyń atynan qońyraý shalyp, skrınıngke jazylýdy rastaýdy surap, SMS arqyly kelgen kodty aıtýyńyzdy talap etedi. Memlekettik medıtsınalyq mekemeler eshqashan skrınıngke jazylýdy SMS arqyly kelgen kodpen rastaýdy talap etpeıdi. Mundaı kod, ádette, tsıfrlyq servısterge kirý nemese belgili bir operatsııalardy rastaý úshin qoldanylady jáne olardy úshinshi tulǵaǵa eshqandaı jaǵdaıda berýge bolmaıdy, - dep eskertedi vedomstvo.
Osy oraıda mınıstrlik alaıaqtar kod arqyly jeke málimetterge, tsıfrlyq qujattarǵa, sonyń ishinde eGov, Kaspi, bank qosymshalary jáne basqa da servısterge qol jetkizýi múmkin ekenin aıtyp otyr.
- Azamattardy qyraǵy bolýǵa shaqyramyz. SMS arqyly kelgen kodty eshkimge, onyń ishinde ózin medıtsına qyzmetkeri retinde tanystyrǵan adamǵa da aıtpańyz. Aqparatty resmı derekkózderden, ıaǵnı emhanada, eGov portalynda nemese medıtsınalyq aqparattyq júıeler arqyly anyqtańyz. Alaıaqtyqqa kúmándansańyz, quqyq qorǵaý organdaryna júginińiz, - delingen habarlamada.
Aı basynda belgili bolǵandaı, elimizde shuǵyl túrde kıber alaıaqtyqpen kúresti kúsheıtetin zań jobasyn ázirleý qolǵa alynady.
Aıta ketsek, Májilis depýtaty Rınat Zaıytov onlaın alaıaqtyqtan kelgen shyǵyndy bankter ózi óteýi tıistigin aıtyp, depýtattyq saýal joldady.