Alaıaqtar elordalyqtardy 2 mlrd 600 mln teńgege san soqtyrdy

Alaıaqtar elorda turǵyndarynyń 2 mlrd 600 mln teńge qarajatyn aldap alǵan. Bul týraly Astana qalalyq polıtsııa departamenti Krımınaldyq polıtsııa basqarmasynyń bastyǵy, polıtsııa polkovnıgi Dastan Qalıev aıtty, dep habarlaıdy QazAqparat tilshisi.

«Bıyl Astana aýmaǵynda aqparattyq tehnologııalardy paıdalana otyryp jasalatyn 3 710 qylmystyq quqyq buzýshylyq tirkeldi. Bul rette azamattarǵa keltirilgen zalal 2 mlrd 600 mln teńgeden asady. Respýblıkalyq aýqymda 15 509 ınternet-alaıaqtyq tirkelgen. ıAǵnı, árbir 4 ınternet-alaıaqtyq Astana turǵyndaryna qatysty jasalady. Tonaý, qaraqshylyq syndy ádettegi qylmystar ekinshi orynǵa syrǵyp otyr. Bul baǵyttaǵy qylmystardyń tómendeýine únemi júrgiziletin jedel aldyn alý is-sharalary, zamanaýı tehnologııalar esebinen tómendedi. Alaıda, aqparattyq tehnologııalardy paıdalana otyryp jasalatyn qylmystar jyldan jylǵa órship barady», - dedi ol Astana qalalyq kommýnıkatsııalar qyzmetindegi brıfıngte.

Onyń atap ótýinshe, alaıaqtardyń qolynan zardap shekkenderdiń bári birdeı quqyq qorǵaý organdaryna júginbeıdi.

«Naqty sandar aıtylǵandardan edáýir kóp jáne statıstıka qandaı ekenin tek boljaýǵa bolady. alaıaqtar ár túrli jastaǵy adamdardy aldaıdy. Egde jastaǵy adamdar kóbinese jańa tehnologııalarmen tanys emes jáne az saqtyq tanytady. Al jeńil aqsha izdeıtin adamdar óz jınaqtaryn salý arqyly qysqa merzimde tez kóbeıtip alamyn dep senedi», -deıdi Dastan Qalıev.

Dastan Qalıev elordalyq polıtsııa departamenti qala ákimdigimen birlesip, turaqty negizde ınternet-alaıaqtyqty azaıtýǵa jáne halyqtyń qarjylyq saýattylyǵyn arttyrýǵa baǵyttalǵan aldyn alý is-sharalaryn júrgizip jatqanyn atap ótti.