Alaıaqtar elimizge mıllıardtaǵan shyǵyn ákeledi

NUR-SULTAN. QazAqparat - QR QM Qarjy monıtorıngi komıtetiniń tóraǵasy Janat Elımanov jalǵan esepshot-faktýrasyn jasaý arqyly memleketke mıllıardtaǵan shyǵyn ákelgen alaıaqtardy atady, dep habarlaıdy QazAqparat tilshisi.

«Máselen, elordada Peretıatko basshylyq jasaǵan uıymdasqan qylmystyq toptyń áreketi áshkere boldy. Olar 10 jyl boıy zańsyz operatsııa júrgizip kelgen. Elimizdiń túrli óńirlerinen 3 myńnan astam kompanııa onyń klıenti bolǵan. Zańsyz qyzmet saldarynan kelgen shyǵyn shamamen 4 mlrd teńgeni quraıdy. Onyń shamamen 1,5 mlrd teńgesi óteldi», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Sonymen qatar tergeý amaldary barysynda Atyraý oblysynda Dáýletıarovanyń, Almatyda Tórequlovanyń uıymdasqan qylmystyq tobynyń áreketine tyıym salynǵan. Tek almatylyq alaıaqtyń bir ózi shamamen 4 mlrd teńgeni qolma-qol aqshaǵa aınaldyrǵan.

«Jalpy bul salada 19 uıymdasqan qylmystyq top joıyldy. Aıta keterligi, sońǵy 5 jylda alǵash ret qolma-qol aqshaǵa aınaldyrý deńgeıi 38 paıyzǵa tómendep otyr», - dedi Janat Elımanov.