Alaıaqtar elektrondy tsıfrlyq qoltańbany buzyp, kólikti basqa bireýge qalaı rásimdeıdi
«Ulttyq aqparattyq texnologııalar» AQ basqarma basshysy Áset Turysovtyń aıtýynsha, merzimsiz elektrondy tsıfrlyq qoltańbany da shyǵarýǵa bolady. Biraq ondaıda qoltańbanyń qaýipsizdik deńgeıi tómen bolady. Búginde álem boıynsha elektrondy tsıfrlyq qoltańba eń kóp degende bes jylǵa beriledi.
«Biz álemdik tájirıbeni jan-jaqty zerdelep shyqtyq. Sóıtip, Qazaqstandańy elektrondy tsıfrlyq qoltańbanyń merzimin úsh jylǵa shyǵarǵan durys dep sheshtik. Sonda qaýipsizdik saqtalady. Al qoltańbany úıden shyqpaı-aq jańartyp alýǵa bolady. Ondaı qyzmet bar. Sondyqtan qoltańbany alý úshin HQKO-ǵa bir ret barsa da jetkilikti. Odan keıin qoltańbany úıden jańartyp otyrýǵa múmkindik bar», - dedi Á.Turysov Astanada ótken baspasóz máslıxatynda.
Kompanııa basshynyń orynbasary Axan Sarmanovtyń sózine qaraǵanda, elektrondy tsıfrlyq qoltańbaǵa qatysty algorıtmniń krıptoqaýipsizdigi tórt-bes jylǵa jetedi.
«Bul degenimiz, tórt-bes jyldan keıin elektrondy tsıfrlyq qoltańbany buzýǵa bolady. Osy ýaqyttyń ishinde xakerler onyń parolin taba alady. Máselen, ótken jyly egov portalynda kólikti rásimdeý qyzmeti iske qosylǵan bolatyn. Kez kelgen adam óziniń elektrondy tsıfrlyq qoltańbasyn paıdalanyp, kólikti basqa bireýdiń atyna aýdara alady. Demek, alaıaqtar tórt-bes jyldyń ishinde qoltańbanyń parolin taýyp ketse, kólikti basqa bireýdiń atyna op-ońaı jazyp bere salady. Sol sebepti qazirgi elektrondy tsıfrlyq qoltańbany úsh jyl saıyn jańartyp otyrý qajet», - dep atap kórsetti A.Sarmanov.
«Ulttyq aqparattyq texnologııalar» AQ málimetine sáıkes, ótken jyly qaýipsizdik júıesinde mıllıondaǵan shabýyldar tirkeldi. Osyǵan baılanysty bıyl QR UQK Aqparattyq qaýipsizdikti ulttyq úılestirý ortalyǵymen birlese otyryp, kıbershabýyldarǵa qarsy arnaıy ortalyqty qurý josparlanyp otyr.
Aıta keteıik, «Ulttyq aqparattyq texnologııalar» AQ jeke qujattardyń elektrondy qoımasyn da iske qosýdy josparlap otyr. Sondaı-aq, kompanııanyń birneshe fýnktsııasyn básekelestik ortaǵa berý josparlanǵan. Onyń ishinde eGov-tyń 1414 baılanys ortalyǵy da bar. Budan bólek, memlekettik organdardyń saıttaryn bir portalǵa biriktirý qolǵa alynǵan.
