Alaıaqtar BQO turǵyndaryna 280 mln-ǵa jýyq teńge shyǵyn keltirgen
ORAL. KAZINFORM – Batys Qazaqstan oblysynda jyl basynan beri óńir turǵyndaryna qatysty 189 ınternet-alaıaqtyq deregi tirkeldi.
BQO polıtsııa departamenti kıberqylmysqa qarsy is-qımyl basqarmasynyń bastyǵy, polıtsııa polkovnıgi Artýr Musaǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, bul ótken jylǵy osy kezeńdegiden (160) kóp.
Artýr Ǵaısaulynyń sózine qaraǵanda, sonyń saldarynan turǵyndarǵa 278 mln 929,113 myń teńge (2024 jyly osy merzimde – 258 mln 202,952 myń teńge) materıaldyq shyǵyn keltirilgen.
- Bank qyzmetkeri retinde qońyraý shalyp, jábirlenýshiniń bank shottaryn qorǵaý syltaýymen jasalatyn alaıaqtyq eń kóp taralyp otyr. Jyl basynan beri 122 turǵyn alaıaqtyqtyń osy túrine aldanyp, san soǵyp qaldy. Sondaı-aq 38 jalǵan qyzmet kórsetý, 8 ınvestıtsııaǵa salym jasaý syltaýy, 8 onlaın taýar satyp alý, 3 aqsha qarajatyn qolma-qol etip aınaldyrý sııaqty aldaý túri kezdesip otyr. Sonyń saldarynan túrli salada jumys isteıtin 68 adam (28-58 jas aralyǵyndaǵylar), 53 jumyssyz (22-56 jas), 42 zeınetker (62-77 jas), 15 muǵalim (42-54 jas), 8 medıtsına qyzmetkeri (39-58 jas), 3 memlekettik qyzmetshi (46-63 jas) zardap shekti, - dedi A.Musaǵalıev.
Onyń aıtýynsha, ınternet-alaıaqtyqtyń jańa tásilderi jıilep ketken. ıAǵnı alaıaqtar jábirlenýshilermen bir aıdan astam ýaqyt boıy sóılesip, senimine kirip aldaıdy. Sáýir aıynan beri osyndaı tórt ınternet-alaıaqtyq deregi tirkeldi. Alaıaqtar aqpan aıynan bastap jedel izdestirý is-sharalary júrgizilýde degen syltaýmen aldap, jábirlenýshilerdiń aqshalaı jınaqtaryn ǵana emes, jyljymaıtyn múlkin de tómen baǵamen satqyzyp, qarjysyn jymqyrǵan. Mysaly, bir jábirlenýshi ózine tıesili eki páterin satyp jibergen.
- Mundaı alaıaqtyq saldarynan jábirlenýshilerge keltirilgen materıaldyq shyǵyn kólemi 75 mln teńgeden asty. Sonyń ishinde bir adam 36 mln teńge zalalǵa qaldy. Alaıaqtar dál osyndaı syltaýmen Terekti aýdanynyń turǵynyn bank arqyly nesıe rásimdeý jáne jınaqtaryn sheshý jolymen alaıaqtyq áreketterdiń aldyn alamyz dep aldap, bir apta ishinde onyń otbasy músheleri — ózi, jubaıy jáne týǵan baýyrynyń 19 mln teńgeden astam aqshasyn ıemdenip ketken, - dedi basqarma bastyǵy.
Onyń málimdeýinshe, qazirgi kezde alaıaqtyq jolmen alynǵan qarajatty óz shottary arqyly ótkizýge kelisim bergen adamdar – dropperlerdi qylmystyq jaýapkershilikke tartý boıynsha zańnamaǵa ózgerister engizý máselesi qaralýda. Dropperler jábirlenýshilerdiń aqshasyn sheteldegi alaıaqtardyń krıptoámııandaryna aýdarady.
Sonymen qatar qarjy naryǵynda «Bankter jáne bank qyzmeti týraly» Zańǵa «Salqyndatý kezeńi» degen jańa uǵym engizý josparlanýda. Bul boıynsha onlaın nesıe (150 AEK nemese 589 800 teńgeden joǵary soma) maquldanǵannan keıin klıent ony tek 24 saǵat ótken soń paıdalana alady. Sondaı-aq kepilsiz nesıe alýǵa alǵash ret júgingen azamattar bankke nemese mıkroqarjy uıymyna jeke ózi kelýge mindetti bolady. Qazirgi ýaqytta bul Zań jobasy Parlament tarapynan maquldandy, qol qoıý satysynda.
- Polıtsııa qabyldap jatqan barlyq is-sharalarǵa qaramastan, bir adam birneshe ret ınternet-alaıaqtyqtyń qurbany bolyp jatqan jaǵdaı oryn alýda. Mundaı mysaldardyń biri retinde Báıterek aýdanynyń turǵynyna qatysty oqıǵany aıtýǵa bolady. Ol 2022 jyly 200 mln teńgeden astam somaǵa alaıaqtardyń arbaýyna túsken edi. Bıyl taǵy da 90 mln astam teńgesinen aıyrylyp qalǵan. Osy rette alaıaqtar eshqashan jábirlenýshiniń qatysýynsyz nesıe resimdeı almaıtynyn atap ótý qajet. Alaıaqtardyń qurbany bolmas úshin eń aldymen beıtanys adamdarmen telefon arqyly sóılespeý kerek, - dep túıindedi oıyn A.Musaǵalıev.
Eske sala keteıik, budan buryn BQO-da otbasylyq-turmystyq qatynastar salasyndaǵy qylmys sany 8 esege kóbeıgenin jazǵan bolatynbyz.