Alaıaqtar bir adamnyń atynan 25 nesıe alǵan
Soltústik Qazaqstan oblysy polıtsııa departamenti baspasóz qyzmetiniń málimetinshe, is-shara aıasynda Petropavl turǵyndaryna profılaktıkalyq jadynamalar men broshıýralar taratyldy. Internet-alaıaqtyqtyń joldary aıtyly. Krımınaldyq polıtsııa qyzmetkerleri ótkizgen aktsııaǵa «Qamqor» klýbynyń eriktileri qosyldy. Soltústik Qazaqstan kásiptik-pedagogıkalyq kolledjiniń stýdentteri jedel ýákildermen birge halyq kóp shoǵyrlanǵan saýda úılerin aralady.
«Bizdiń maqsatymyz – halyqty eskertý, óıtkeni sońǵy kezde ınternet-alaıaqtyń túr-túri shyǵyp jatyr. Bizdiń eskertpemiz turǵyndarǵa alaıaqtardan qorǵanýǵa kómektesedi dep úmittenemiz. Bizdiń túsiniktemelerimiz osyndaı qylmystardyń sanyn azaıtsa degen tilek bar. «Habardar bolsań – saq bolasyń» dep bekerge aıtpaıdy ǵoı», - deıdi volonter Danıal Isaev.
Osy jyldyń basynan beri 270-ten astam soltústikqazaqstandyq túrli onlaın-resýrstar arqyly alaıaqtardan zardap shekti.
«Áleýmettik jelilerde kúmán týǵyzatyn kez kelgen jaǵdaıǵa kelispegen jón, taýarlardy satyp alý-satý kezinde aldyn-ala tólemderden bas tartý qajet, bank kartasynyń nómirlerin, PIN-kodtardy, sondaı-aq uıaly telefonǵa túsken parolderdi eshkimge aıtpaý kerek. Bul messendjerler jáne basqa elektrondyq resýrstar arqyly Internettegi alaıaqtyq is-áreketten qorǵaı alatyn alǵashqy erejeler», - deıdi SQO PD Krımınaldyq polıtsııa basqarmasynyń bastyǵy Petr Klımov.
Osy aptada Petropavl qalasynyń turǵyny polıtsııaǵa júgindi, ol óziniń 4 mıllıon teńge kóleminde 25 shaǵyn nesıesi bar ekenin bilgen. Qazir mán-jaı anyqtalyp jatyr.
