Alaıaqtar balanyń emine jınalǵan qarjyny jymqyryp ketken – Qostanaı
QOSTANAI. QazAqparat – Qostanaı oblysynda jetinshi ret ótip jatqan «Joldaǵy qabyldaý» aktsııasy aıasynda polıtsııa departamentiniń bastyǵy Beket Aımaǵambetov «Nur Otan» partııa fılıalynda azamattardy jeke suraqtarymen qabyldady, dep habarlaıdy QazAqparat.
Oblystyń bas polıtseıine 12 adam saýal qoıdy, onyń úsheýi ınternet-alaıaqtyqty ashý boıynsha tártip saqshylarynyń jumysyn atap ótti.
Oblys ortalyǵynyń turǵyny Natalıa Kononova nemeresine qymbat ota jasaýǵa qarajat jınaý úshin turǵyndarǵa júginýge májbúr bolǵanyn aıtty. Emdeý Máskeýdegi emhanada júrgizildi. Nátıjesinde qostanaılyqtar qysqa ýaqyt ishinde qajetti somany jınaǵan. Dárigerler ota jasaý kúnin belgilegenmen, bank kartasynan barlyq soma urlanyp ketken.
Natalıa Kononova polıtsııaǵa aryz jazdy. Tártip saqshylary qylmysty ashyp, Qazaqstannyń basqa qalasynyń turǵynyn ustady. Ol áleýmettik jelilerden balany emdeýge aqsha jınaıtynyn bilip, bank kartasyn buǵattaý arqyly qarjyny jymqyrǵan.
«Bizge barlyq aqshany qaıtarǵan kezde qatty qýandym. Endi bizdi ońaltý kezeńi kútip tur. Biraq barlyq qıyndyqtar artta qaldy. Qylmyskerdi jedel taýyp alǵany úshin tártip saqshylaryna alǵys», - dedi jábirlenýshi.
Polıtsııa departamentiniń bastyǵy alaıaqty taýyp alǵan qyzmetkerlerdi marapatqa usynatynyn jetkizdi.
