Alaıaqtar atyraýlyq zeınetkerlerdiń 1 mln teńgesin jymqyrdy
ATYRAÝ. QazAqparat - Bir óńirden ekinshisine kete beretin alaıaqtar atyraýlyq zeınetkerlerdiń 1 mln teńge jymqyrdy.
«Qylmysqa eki jigit pen bir boıjetken barǵan. Ózderin gaz kompanııasynyń qyzmetkerimiz dep tanystyrǵan olar aldaı otyryp zeınetkerlerdiń páterine kirgen. Sóz arasynda olar aqshanyń jasandy túrleri kóbeıip ketkendikten saq bolý kerektigin eskertken. Osy tusta kýpıýrany tekseretin qurylǵylaryn kórsetken. Jas úlken adamdar qurylǵyǵa qyzyǵýshylyq tanytyp jıǵan aqshalaryn teksertip almaq bolady. Qarttardyń aqshany qaıda qoıǵanyn bilgen olar ony urlap ketip otyrǵan. Úsh zeınetkerden qylmyskerler 1 mln teńge jymqyrǵan. 93-tegi aqsaqaldan - 122 myń teńge, 80-degi qarııadan - 18 teńge, 74-tegi zeınetkerden 700 myńnan astam teńge ıemdenip ketken. Qazir alaıaqtarǵa aldanyp qalsa da polıtsııaǵa shaǵymdanbaǵan osyndaı adamdar bar bolý múmkin ekendigi joqqa shyǵarylmaıdy», - dedi óńirlik ІІD baspasóz hatshysy Gúlnázıra Muhtarova.
Kúdiktiler Oral qalasynda qolǵa tústi. Alaıaqtardyń biri 1981 jylǵy batysqazaqstandyq. Ekinshisi 25 jastaǵy almatylyq. Olar buǵan deıin de osyndaı qylmystary úshin jaýapqa tartylǵan.
