Alaıaqtar astanalyqtardy ınternet-tuzaqqa qalaı túsiredi
ASTANA. QazAqparat - Astanada áleýmettik jeliler arqyly halyqty aldaý faktileri kóbeıip otyr. Polıtsııa qyzmetkerleri ınternet-alaıaqtyqqa qatysy bar birneshe kúdiktiniń ústinen qylmystyq is qozǵady, dep habarlaıdy QazAqparat tilshisi.
Qalalyq Polıtsııa departamentiniń baspasóz qyzmetinen málim etkendeı, alaıaqtar áleýmettik jelilerdi belsendi paıdalanady. Halyqty aldaý tásilderi ártúrli. Biri WhatsApp arqyly aqshany eselep berýge ýáde etse, biri baǵaly tondardy «satqan». Al 18 jastaǵy elordalyq sporttyq stavkalar arqyly qyrýar aqshaǵa kenelte alatynyna sendirgen.
Máselen, polıtseıler Aqmola oblysynyń týmasy, 51 jastaǵy áıeldi ustaǵan. Ol WhatsApp messendjerinde toptyq chattardy ashyp, adamdarǵa aqshalaryn eselep ósirip berýge ýáde etken. Qarjyny elektrondy aqsha boıynsha bırjalyq mámilelerge qatysý arqyly arttyratynyn aıtqan.
«Ol salymshylardy ártúrli jeńildikter men aktsııalar arqyly qyzyqtyra túsken. Aqshany kıvı-ámııan arqyly qabyldaǵan. 2 jeltoqsan kúni polıtsııaǵa azamatsha D. aryzdanyp, álgi áıeldiń qyrkúıek aıynyń sońynda 400 myń teńge alyp, eki eselep berýge ýáde etkenin aıtty», - delingen baspasóz habarlamasynda.
Qazirgi ýaqytta polıtsııa qyzmetkerleri osyǵan uqsas on jaǵdaıǵa qatysty sotqa deıingi tergeý amaldaryn júrgizip jatyr. Jábirlenýshilerdiń sany odan da kóp bolýy ábden múmkin. Osyǵan baılanysty quqyqqorǵaýshylar ınternet alaıaqtyqtan zardap shekkender bolsa Astana qalasynyń Polıtsııa departamentine júginýge nemese (7172) 71-62-91,71-63-35 (nemese102) nómirine habarlasýdy suraıdy.
Sol sekildi astanalyq quqyqqorǵaýshylar osyǵan uqsas qylmys boıynsha Qaraǵandy qalasynyń 23 jastaǵy turǵynyn qolǵa túsirdi. Anyqtalǵanyndaı, ol Іnstagram arqyly jalǵan akkaýnt ashyp, ton men ań terisinen tigilgen kıimderdi satatynyn jazǵan. Utymdy baǵalarmen jarnaman jasaǵan. Qoldanýshylardy tartý úshin basqa ınternet-resýrstardan júktelgen sýretterdi salyp otyrǵan. Ton alamyn deýshilerge kıvı-ámııan arqyly tólemdi 100 paıyz aldyn ala joldaýǵa mindettep, aqsha túskennen keıin nómirdi óshirip tastap otyrǵan. Qazirgi tańda kúdikti Qylmystyq kodekstiń 190-baby 2-bóligimen 8 fakti boıynsha (jalpy keltirilgen zııan 1 mln teńge) qylmystyq jaýapkershilikke tartylýda.
Sonymen birge 29 qarashada tártip saqshylary 18 jastaǵy qala turǵynyn ustaǵan. Ol Іnstagram arqyly jalǵan akkaýnt ashyp, sporttyq stavkalar arqyly aqsha aınaldyryp alýǵa bolatyny jaıly jazǵan. Habarlamasyn qyzyqty ete túsý úshin utyp alǵandardyń aqshasy degen jazýmen kýpıýralardyń sýretterin júktegen. Qazirgi ýaqytta oǵan qatysty Qylmystyq kodekstiń 190-baby 2-bóligimen sotqa deıingi tergeý amaldary júrgizilýde.
