Alaıaqtar Almaty turǵyndaryn aldap, nesıe aldyryp kelgen
ALMATY. QazAqparat - Eki qurby ondaǵan almatylyqty aldap soǵyp, olardyń aqshasyn ıemdenip aldy, dep habarlaıdy «QazAqparat» HAA tilshisi qalalyq ІІD-ǵa silteme jasap.
Polıtsııanyń deregi boıynsha, 1991 jyly týǵan Araı Mustafaeva men 1986 jylǵy Juldyz Shaıjanova alaıaqtyq jasady degen kúdik keltirýde. Áýezov aýdandyq ІІB deregine súıensek, qazirgi tańda tergeý bóliminiń óndirisinde 10-nan astam adamnyń shaǵymy bar.
«Zardap shegýshilerdiń aqparaty boıynsha, bul áıelder ózderiniń múmkindikteriniń shekteýli ekendigin alǵa tartyp, azamattardy tutynýshylyq nesıe alýǵa úgitteıdi. Biraq, zardap shegýshilerdi, aldymen, taýarlyq nesıe rásimdeýge shaqyrady. Taýarlyq nesıe alý olardyń nesıelik tarıhyna oń áser etetinine sendiredi. Nátıjesinde, olar alynǵan taýardy menshiktenip, turǵyndarǵa bergen ýádelerin oryndamaǵan. Kóptegen adamdardyń zardap shekkenine qarap, olardyń osy sekildi ózge de qylmystarǵa qatysy bolýy múmkin», - dep habarlady Áýezv aýdandyq ІІB ishki ister bastyǵynyń birinshi orynbasary, polıtsııa polkovnıgi Qumarbek Kenshinbaev.
Polıtsııa atalǵan tulǵalardan zardap shekken azamattardy myna telefon boıynsha baılanysýǵa shaqyrady: 298-53-01 jáne 298-53-05.
