Alaıaqtar aqsýlyq áıeldiń 15 mıllıon teńgesin úptep ketti
PAVLODAR. KAZINFORM - Aqsý qalasynyń turǵyny WhatsApp messendjeri arqyly kelgen jalǵan jazbaǵa senip, aldanyp qaldy. Alaıaqtar onyń depozıttegi aqshasyn sheship, mıllıondaǵan teńge nesıe rásimdegen.
Óńirlik polıtsııa departamentinen habarlaǵandaı, alaıaqtar qoǵamdyq ómirdegi trendter men qarjy naryǵyndaǵy jańalyqtardy turaqty baqylap, ádisteri men shemalaryn únemi jetildirip otyrady. Qaskúnemder ózine qajetti aqparatqa qol jetkizse, birneshe mınýt ishinde shotyńyzdaǵy bar qarajatty qaltasyna basyp, mıllıondaǵan nesıeni moınyńyzǵa ilip kete beredi.
Mundaı alaıaqtyq shemalarynyń birine Aqsý qalasynyń turǵyny tap boldy. Ol qaskúnemderdiń aıla-sharǵysyna tutylyp, 15 mln 257 myń teńge somasynda nesıeni arqalap qaldy.
- Maǵan WhatsApp arqyly ózim jumys isteıtin zaýyttyń kásipodaq komıtetiniń tóraǵasynan habarlama keldi. Belgisiz adamdar meniń atyma nesıe rásimdegeni týraly jazypty. Bir mınýttan keıin maǵan Ulttyq banktiń qyzmetkerleri qońyraý shalyp, aqshanyń qaýipsizdigin qamtamasyz etý úshin qarajatty shuǵyl túrde ózge shottarǵa aýdarýym kerek dep sendirdi. Qoryqqanymnan olardyń aıtqanyn qalaı jasaǵanymdy sezbeı de qaldym. Eki banktegi depozıtten aqshamdy sheship, sondaı-aq basqa bankten nesıe rásimdep, kórsetilgen túrli shottarǵa aýdardym, - dep bólisti óziniń aldaný oqıǵasy týraly jábirlenýshi áıel.
Aqyr-sońy ol óziniń alaıaqtardyń qurbany bolǵanyn túsinip, polıtsııaǵa habarlasqan.
Polıtseıler mańyzdy qarjylyq sheshimder qabyldaýǵa eshqashan asyqpaý kerektigin eskertedi. Beıtanys adamdarǵa jeke derekterińizdi, sonyń ishinde jeke basty kýálandyratyn qujattardyń kóshirmelerin jibermeńiz.
Buǵan deıin elýden asqan adamdar ınternet alaıaqtaryna jıi aldanatyny týraly jazǵanbyz.